ABB səhmlərinin yerləşdirilməsi 6 ay çəkəcək

Azərbaycanın ən böyük bankının 200 mln manatlıq səhmlərinin yerləşdirilməsi 12 dekabrda başlayacaq və 6 ay çəkəcək. Bu şərtlər Bakı Fond Birjasının saytında açıqlanan emissiya prospektində nəzərdə tutulub. 

Bankın mövcud səhmdarları (1800-dən çox fiziki və hüquqi şəxs) 4 ayda səhm alışı üzrə imtiyazlarından istifadə edə bilərlər. 

Sənədə əsasən, 1 oktyabr üçün ABB-nin depozit, kredit, sindikatlaşdırılmış kredit və subordinasiyalı kredit şəklində ABŞ dolları və avro ilə 2 mlrd 854,5 mln manat kreditor borcu var. Bankın 6 ay üzrə hesabatında göstərilir ki, ABB qrupunun aktivləri 6,7 mlrd manatı keçir. Ödənilmiş nizamnamə fondu 340 mln manat, səhmdar kapitalı 486,2 mln manatdır. 

Hazırda ABB-nin dövriyyədə nominalı 0,26 manat olan 1 mlrd 416 mln 666 min 675 ədəd səhmi var. Bu buraxılışda 769 230 775 səhm yerləşdirmək nəzərdə tutulur. 

2012-ci ildə ABB nizamnamə kapitalı artımına 28 333,3 min manat bölünməmiş mənfəət yönəldib və hazırda nizamnamə kapitalı 368,3 mln manatdır. 

Hökumət bankda 50,2% səhm payına malikdir. Ondan başqa bankda heç kəsin payı 10%-dən çox deyil. 08D