AİB elektrik şəbəkəsi üçün Azərbaycana $250 mln ayırır

Azərbaycan və Asiya İnkişaf Bankı (AİB) respublikanın elektrik paylayıcı sisteminin yaxşılaşdırılması üçün çoxtranşlı maliyyələşmə proqramı çərçivəsində $250 mln məbləğində ilk tranşın ayrılmasına dair kredit və zəmanət sazişi imzalayıb.

Zəmanət sazişini maliyyə naziri Samir Şərifov və AİB-in Azərbaycandakı nümayəndəliyinin rəhbəri Nəriman Manapbekov, kredit sazişini isə “Azərişıq” ASC-nin sədri Balababa Rzayev və N.Manapbekov imzalayıblar.

Layihə AİB Direktorlar Şurası tərəfindən 12 iyul 2016-cı ildə təsdiq edilib. AİB layihənin ¾-ü - $750 mln ayıracaq. Sazişə əsasən, vəsaitlər LIBOR+0,6% dərəcəsi ilə ayrılacaq.

Qalan $250 mln-u Azərbaycan hökuməti ayıracaq.

Birinci tranş mal, iş və xidmət alınmasını nəzərdə tutur.

Proqramda şərti olaraq Aran, Bakı, Cənub, Qərbi Aran, Şimal və Şimal-Qərb kimi təyin edilən 7 regional elektrik paylayıcı şəbəkəsi nəzərdə tutulub və 1,4 mln istehlakçını əhatə edəcək. Bu vəsaitlər 2022-ci ilin sonunadək 6 il ərzində sərf olunmalıdır.

Layihə üzrə işlər 2018-ci il dekabrın 31-dən başa çatmalı, vəsaitlər isə 2019-cu il iyunun 30-dək sərf olunmalıdır. Layihə çərçivəsində Azərişıq 1,3 min km uzunluğunda elektrik ötürücü xətləri (EÖX) və abonentlər üçün 3,9 min km uzunluğunda EÖX çəkməli, 108,4 min ədəd smart-kart tipli sayğac, onlarla yarımstansiya və minlərlə transformator quraşdırmalıdır.

1999-2016-cı illərdə bank Azərbaycanda 59 layihənin həyata keçirilməsi üçün $2 mlrd 321,62 mln vəsait ayırıb.—0--