AMB-nin depozitləri kommersiya banklarının əsas gəlir mənbəyi olub

Kommersiya bankları kreditləşməni kəskin azaldaraq Mərkəzi Bankın notlarını alıb hesablarında olan vəsaiti ölkənin baş bankında depozit kimi qoymağa başlayıb. Hazırda AMB-nin depozitləri kommersiya banklarının əsas gəlir mənbəyinə çevrilib.

«Bankların hesabında vəsait var, amma ağır maliyyə vəziyyəti ilə bağlı əhaliyə kredit verməyə risk etmirlər. Milli valyuta emitentinin depozit hərracları onlar üçün yaxşı gəlir mənbəyinə çevrilib. Son vaxtlar AMB hərraclarında artan tələb onunla bağlıdır ki, bu depozitlərin kreditlərdən fərqli olaraq, risklərdən zəmanəti var», - deyə Vəkillər Kollegiyasının üzvü, “Bank hüququ” kitabının müəllifi Əkrəm Həsənov Turan-a bildirib. 

Banklar üçün qısamüddətli vəsait qoyuluşunun zəmanəti olsa da, prosesin özünü normal saymaq olmaz, deyə müsahib bildirib.

«AMB iqtisadiyyata bank sərmayəsi qoyulması və real sektorun kreditləşməsinə kömək etməlidir. Bunun əvəzinə tənzimləyici bütün vəsaitlərin öz depozitinə və borc qiymətli kağızlarına cəlb edilməsi üçün hər cür şərait yaradır. Beləliklə, Mərkəzi Bank manatın daha da düşməsi və inflyasiyanın qarşısını almaq üçün  dövriyyədəki pul kütləsini azaltmaq istəyir. Nəticədə bütün pullar bank sistemində dolanır, iqtisadiyyat pulsuz qalır. Pulunu AMB-yə etibar edən banklar sabit və zəmanətli gəlir əldə edir, əslində bunun hesabına yaşayır», - deyə ekspert bildirib.

Aprelin 3-də keçirilən son hərracda tələb təklifdən 49,2 % çox olub. Mərkəzi Bank banklardan 100 mln manat qəbul edib, tələb isə 149,2 mln manat olub. Depozit əqdləri üzrə orta ölçülmüş qiymət 14,76% olub. Martın 27-dəki hərracda AMB 300 mln manat, 31 martda 200 mln manat cəlb edib. Depozit hərracı Bloomberg ticarət platformasında keçirilir. Hərraclar 13 iyun 2016-cı ildən keçirilir.

Bundan başqa, Maliyyə Bazarlarına Nəzarət Palatası həftənin əvvəlində AMB-nin 50 mln manat məbləğində qısamüddətli notlarının emissiya prospektini qeydiyyata alıb. Emissiya çərçivəsində qiyməti 100 manat, tədavül müddəti 28 gün olan 500 min not buraxılıb.

Qısamüddətli notlar və depozit hərracları pul kütləsinin tənzimləmək üçün pul-kredit siyasətinin alətidir. –0—