«Atəşgah» birja elektron ticarət sistemində ilk sığortaçıdır

Martın 14-də Bakı Banklararası Valyuta Birjası (BBVB) və “Atəşgah Sığorta” şirkəti birja elektron ticarət sistemində (BEST) “MONEY-MARKET” pul bazarında sığorta şirkətinin iştirakına dair müqavilə bağlayıblar. Müqaviləni BBVB-nin rəhbəri Fərhad Əmirbəyov və “Atəşgah Sığorta”nın İdarə heyətinin sədri Tələt Səfərov imzalayıblar.

Müqaviləyə əsasən, “Atəşgah Sığorta” iştirakçı banklar ilə bərabərhüquqlu olaraq topdan pul bazarına çıxış imkanları əldə edir. BBVB yeni iştirakçıya ticarət sisteminə çıxış təqdim edəcək, həmçinin hesablaşma və məlumat xidmətləri göstərəcək.

Pul bazarı seqmentində əməliyyat və hesablaşmalar «BEST sistemində pul vəsaitlərinin cəlb edilməsi və yerləşdirilməsi üzrə müvəqqəti qaydalar», « BEST sistemində hərracların təşkili və hesablaşma aparılması reqlamenti», " MONEY-MARKET maliyyə alətlərinin spesifikasiyası" əsasında həyata keçirilir. 

Fərhad Əmirbəyov imzalanma mərasimində deyib ki, “Atəşgah Sığorta” belə müqaviləni imzalayan ilk sığorta şirkətidir.

Onun sözlərinə görə, sığorta şirkətləri Azərbaycan bankları üçün likvidliyin vacib tədarükçüləridir və şübhəsiz ki, onlar depozit bazasını gücləndirəcəklər.

"Sığorta şirkətləri ölkə bankları üçün əsas likvidlik tədarükçüləridir, depozit bazasını möhkəmləndirir. Sığorta şirkətləri müvəqqəti sıərbəst olan vəsaitləri operativ şəkildə yerləşdirmək imkanı əldə edirlər", - deyə Əmirbəyov bildirib. 

“Artıq bu ilin mayından etibarən sığorta şirkətləri BEST vasitəsilə ölkənin pul bazarına çıxa biləcəklər”, - Əmirbəyov qeyd edib.

Öz növbəsində, Tələt Səfərli bildirib ki, sığorta şirkəti pul vəsaitlərinin toplanması ilə məşğul olur və bundan sonra həmin vəsaitlər yerləşdirilməlidir.

Onun sözlərinə görə, vəsaitlərin yerləşdirilməsi sığorta şirkətinin fəaliyyətinin əsas istiqamətlərindən biridir. “Lakin yerli bazar hələlik bu sahədə məhdud fəaliyyət alətlərinə malikdir. BEST-in işi öz likvidliyini idarə etmək, gəlirlərini artırmaq, habelə digər imkanları genişləndirmək məqsədilə şirkətlər üçün çox maraqlıdır”, - Səfərli qeyd edib.

Bakı Banklararası Valyuta Birjası 21 iyun 1993-cü ildə QSC kimi yaradılıb. Səhmdarları bunlar idi: AMB, ABB, Sənaye-İnvestisiya Bankı, Aqrar-sənaye Bankı, Əmanət Bankı. Son üçü birləşəndən sonra bu gün səhmdarların sırasına Kapital Bank və "Аqrarkredit" QBKT də daxildir. 

Birja elektron ticarət sistemi (Bourse E-system of Trades) Qeyd edək ki, Birja Elektron Ticarət Sistemi (BEST) valyuta risklərinin kompleks şəklində və bankların qısamüddətli likvidliyinin idarəedilməsi üçün avtomatlaşdırılmış universal sistemdir. Bu sistem vasitəsilə valyuta üzrə elektron hərracların keçirilməsi və  əməliyyatların aparılması mümkündür. BEST  maliyyə bazarının birja seqmentində likvidliyin artırılmasına,  valyuta əməliyyatlarının uzun müddət ərzində keçirilməsinə və əqdlərin müxtəlif məzənələrlə bağlanılmasına və maliyyə bazarında sistem risklərinin azadılmasına imkan yaradır. 

 «Atəşgah Həyat» 1998-ci ilin martında yaradılıb. "Atəşgah Həyat Sığorta" “İntermed” tibb klinikası ilə “Atəşgah” sığorta qrupuna daxildir. 

   2012-ci ildə mükafatları 53,5 mln manat, ödənişləri 13,2 mln manat olub. «Atəşgah" 20-dən çox sığorta növü üzrə xidmət göstərir. --17D—