AVSMMİS üzrə ikinci kompensasiya ödənildi

Avtoqəza zamanı zərər çəkən daha bir şəxs İcbari Sığorta Bürosunun xətti ilə kompensasiya alıb. 

Büronun saytında deyilir ki, Azərbaycan Respublikasının vətəndaşının sağlamlığına ağır dərəcəli xəsarətlərin alınmasına səbəb olmuş yol-nəqliyyat hadisəsi ilə əlaqədar 1191,50 ( bir min yüz doxsan bir-əlli ) manat məbləğində kompensasiya ödənişi verilib. 

Bu, büronun ikinci kompensasiyasıdır. Əvvəllər məlumat verildiyi kimi, 2012-ci ilin dekkabrında Büro YNH nəticəsində vətəndaşın həlak olması faktı üzrə 5 min manat kompensasiya ödəmişdi. 

Sığorta agentlərinin I forumunda İcbari Sığorta Bürosunun icraçı direktoru Elxan Quliyev qeyd etmişdi ki, ödəniş olacağı bir sıra hallar üzrə araşdırma aparılır. 

İcbari Sığorta Bürosu 16 dekabr 2011-ci ildə yaradılıb. Hazırda 12 üzvü var.  

Büronun əsas funksiyası – kompensasiya ödəmələri həyata keçirmək və onların vasitəsilə bu kompensasiyaların ödəniləcəyi müəyyən maliyyə fondunu idarə etməkdir. Kompensasiyalar Büroya üzv olan sığorta şirkətləri müflisləşəcəyi təqdirdə ödəniləcək. 

Büronun maliyyə vəsaitləri üzvlük haqlarından, hər icbari sığorta növlərinə dair zəmanət depoziti, həmçinin sığorta şirkətlərinin hər ay büroya köçürəcəyi icbari növlərə görə ümumi mükafatların həcminin 5%-dən formalaşır. 

“İcbari sığorta növləri haqqında» qanun 4 icbari sığorta növünə şamil edilir. Bunlar avtonəqliyyat sahiblərinin mülki məsuliyyətinin icbari sığortası, daşınmaz əmlakın sığortası, daşınmaz əmlak istifadəsi zamanı mülki məsuliyyətin sığortası, sərnişinlərin sığortasıdır.

Bu zaman qanunun şərtlərinə görə, bu icbari sığorta növlərinə görə xidmətləri ancaq Büro üzvü olan sığorta şirkətləri təqdim edə bilər. --17D—