Azərbaycanda MDB-nin bir sıra tikinti standartları qüvvəyə minib

Azərbaycan Respublikasının Standartlaşdırma, Metrologiya və Patent üzrə Dövlət Komitəsi MDB ölkələrinin tikintidə standartlaşdırma, texniki normalaşdırma və sertifikatlaşdırma üzrə dövlətlərarası komissiyasının təsdiq etdiyi 27 standartı dövlət qeydiyyatına alıb. Ötən illər Azərbaycanda onlarla belə standart tətbiq üçün təsdiq edilib. 

Standartlar 6 mayda qeydiyyata alınıb və mayın 10-da qüvvəyə minib. Amma Dövlət Şəhərsalma və Arxitektura Komitəsi məlumatı iyunun 4-də açıqlayıb. 

Bu informasiyaya əsasən (http://arxkom.gov.az/?/az/news/view/259/), Azərbaycan ərazisində qüvvəyə minən standartlar dövlətlərarası komissiya tərəfindən 2007-2012-ci illərdə qəbul edilib. Onların yarıdan çoxu (17) Avropa normativləri əsasında hazırlanıb. 

DŞAK-ın məlumatına görə, 20 standart konkret tikinti materialının (hidroizolyasiya üçün bitumtərkibli elastik materiallar, qruntlar, qapı və pəncərə blokları və s.) müxtəlif parametrlərinin müəyyən edilməsi və təcrübəsinə yönəldilib.

Həmçinin bir neçə tikinti materialının texniki şərtləri təsdiq edilib (Beton konstruksiyalarının armaturlaşdırılması üçün polimer kompozit armatura, avtoklav bərkiyən betondan hazırlanan armaturlandırılmamış divar məmulatları, avtoklav bərkiyən məsaməli betonlar və s.). Azərbaycanda (ГОСТ 30491-2012) «Yol və aerodrom tikintisi üçün üzvü yapışdırıcılarla bərkidilmiş                                          üzvümineral qarışıqlar və qruntlar» texniki şərtləti qüvvəyə minib. 08D