«Azərbaycansayağı özəlləşmə» davam edir

İlin I yarısında Azərbaycanda özəlləşdirilən obyektlərin sayı azalıb. Bu, işgüzar aktivliyin azalmasını göstərir.

Əmlak Məsələləri Dövlət Komitəsinin məlumatına görə, 6 ayda 355 kiçik özəlləşmə subyekti (müəssisə, nəqliyyat vasitəsi, yarımçıq tikili, qeyri-yaşayış tikilisi və s), 222 obyekt altındakı torpaq sahəsi, 14 SC-nin səhmləri özəlləşdirilib. 2014-cü ilin eyni dövründə 370 kiçik özəlləşmə subyekti, 270 özəlləşmiş və xüsusi müəssisənin torpağı, 17 SC-nin səhmləri özəlləşdirilib.

Müşahidəçilərin fikrincə, ölkədə özəlləşmə korrupsiya xarakterlidir: bütün obyektlər əvvəlcədən danışılmış şəxslərə satılır, ona görə hərraclarda rəqabət olmur. Obyekt start qiymətinə satılır, bu qiymət isə bazar qiymətindən dəfələrlə ucuz olur.

Özəlləşmə üzərində nəzarət praktik olaraq yoxdur. Dövlət başçısının sərəncamı ilə yaradılan Artur Rasizadənin rəhbərlik etdiyi Dövlət Əmlakının Özəlləşdirilməsinə Nəzarət üzrə Dövlət Komissiyası yaranandan – 28 fevral 2007-ci ildən bir dəfə də toplanmayıb.

1996-2013-cü illərdə Azərbaycanda 40 min kiçik müəssisə və obyekt, eləcə də nəqliyyat vasitəsi özəlləşdirilib. ƏMDK 2014-cü il üçün dəqiqləşdirilmiş məlumatı açıqlamır.

Naxçıvan MR-da özəlləşməni yerli hökumət həyata keçirir. 08D