Bakıda dəniz limanlarında əməliyyatlar və idaretməyə həsr edilmiş seminar keçirilib

Bakıda dəniz limanlarında əməliyyatlar və idaretməyə həsr edilmiş seminar keçirilib.

Avropa İttifaqının Bakıdakı nümayəndəliyinin rəhbəri Malena Mardın sözlərinə görə, 2006-cı ildən Aİ Azərbaycanda TAIEX proqramı xətti üzrə müxtəlif sahələrdə 213 layihə reallaşdırıb. Aİ ilə qonşu ölkələrdə 3 mindən çox layihə həyata keçirilib.

Malena Mard hesab edir ki, Azərbaycanın coğrafi mövqeyi nəzərə alınmaqla Şimalı Cənubla və Şərqi Qərblə birləşdirən nəqliyyat və logistik mərkəzə çevrilməsi üçün böyük potensialı var.

Bakı Beynəlxalq Dəniz Limanının baş direktoru Taleh Ziyadovun sözlərinə görə, iri dünya limanları ilə əməkdaşlığı genişləndirmək, Sinqapur, Dubay və Rotterdamın təcrübəsindən yararlanmaq lazımdır. Həmçinin Antverpen limanı ilə memorandum imzalanıb.

Bakı Beynəlxalq Dəniz Limanının tikintisinə 2010-cu ilin noyabrında başlanılıb. 400 ha ərazinin 115 hektarı azad ticarət üçün nəzərdə tutulub.

Layihəyə əsasən,  2017-ci ildə liman 10 mln ton yük və 50 min konteyner qəbul edəcək. Bütün işlər başa çatandan sonra limanın gücü 25 mln ton və 1 mln konteynerə çatacaq. --17D—