«Bank Standart»ən əmanətçiləri ilk gündə 8 mln manat kompensasiya alıb

Əmanətlərin Sığortalanması Fondu oktyabrın 11-də  “Bank Standart”ən əmanətçilərinə kompensasiya verməyə başlayıb, deyə Fond bildirir.

Turan-ın məlumatına görə, həmin gün əmanətçilərə 8 mln 230 min manat kompensasiya verilib.

Kompensasiya verilməsi bir il davam edəcək.

“Bank Standard” əmanətçilərinin sayının çox olmasını və əmanətçilər arasında sosial həssas təbəqələrin olmasını nəzərə alaraq Əmanətlərin Sığortalanması Fondu tərəfindən ilkin mərhələdə 20 min ABŞ dollar məbləğinə qədər olan qorunan əmanətlər üzrə kompensasiyaların ödənişi həyata keçiriləcək. Qorunan əmanətlər öz valyutasında ödəniləcək. Bir əmanətçinin bir neçə valyutada əmanəti olduqda yəni həm milli, həm də xarici valyutalarda əmanəti olduqda isə kompensasiyalar “Əmanətlərin Sığortalanması haqqında” Azərbaycan Respublikası Qanununa müvafiq olaraq toplanılır və sığorta hadisəsi baş verən günü (04 oktyabr 2016-cı il) rəsmi məzənnəyə müvafiq olaraq manatda ödənilir.  

Daha iri məbləğdə qorunan əmanətlər üzrə kompensasiyaların ödənişinə isə yaxın günlərdə başlanılacaq və bu barədə Maliyyə Bazarlarına Nəzarət Palatası və Əmanətlərin Sığortalanması Fondu ictimaiyyəti əlavə məlumatlandıracaq.    Kompensasiyaların ödənişi “Bank Standard” KB-nin baş ofisi daxil olmaqla Bakı şəhəri və regionlarda yerləşən 14 filialında həyata keçiriləcək.

Əmanəti qorunan əmanətçilər 1 il ərzində istənilən vaxtı müraciət edərək kompensasiyalarını ala bilərlər.

“Bank Standard”da əhalinin əmanətləri  603 mln manatdır. Bunun 460 mln manat kompensasiya ediləcək. Dollar əmanətləri 175 mln manat əmanətləri 172 mln-dur. –71D-