Büdcədən kənar vəsaitlərin istifadə olunması ilə bağlı məlumatların dərc olunmasına dair hesabatlılığa riayət olunmur

Əməkdaşlarının mükafatlandırılması üçün büdcədən kənar fondları olan mərkəzi icra hakimiyyəti orqanları vəsaitlərin istifadə olunması ilə bağlı hesabatların dərc olunması tələblərini yerinə yetirmir. Bu pozuntunun hamını əhatə etməsinə baxmayaraq, hökumət hələ bu strukturlardan heç birinə irad bildirməyib. Əməkdaşları əhali və sahibkarlarla birbaşa əlaqəsi olan müxtəlif strukturların nəzdindəki büdcədən kənar fondlar əsasən 2011-ci ilin yanvar ayında qaldırılan növbəti antikorrupsiya dalğası çərçivəsində yaradılmağa başladı. Prezident İlham Əliyevin fərmanlarına əsasən, xidmət haqqı, cərimə və maliyyə sanksiyaları kimi toplanan vəsaitlərin bir hissəsi bu fonda daxil olur. Nazirlər Kabinetinin 2011-ci il 29 sentyabr tarixli qərarına əsasən, bu vəsaitlərin istifadə olunmasına dair hesabatlar rübdə bir dəfə dərc edilməlidir. Bu zaman vəsaitlərin istifadə olunması həm çap edilən KİV-də, həm də dövlət orqanının informasiya mənbəyində dərc edilməlidir. 

Qismən bu tələbləri yalnız Vergilər Nazirliyi yerinə yetirir. Bu günlərdə Vergilər Nazirliyi özünün internet portalında əməkdaşların mükafatlandırılması üçün nəzərdə tutulan vəsaitlərin istifadəsinə dair məlumat yerləşdirib. Maraqlıdır ki, fondda olan 2,5 mln manatdan bir manat da olsun vergi əməkdaşlarına əmək haqqına artım şəklində verilməyib. Faktiki olaraq 1,8 mln manatdan artıq vəsait istifadə olunub. 600 min manatdan artıq müxtəlif maşınlar, avadanlıqlar və nəqliyyat vasitələrinin alınmasına xərclənib. Vergilər Nazirliyinin ştatdankənar işçilərinə 400 min manatdan artıq vəsait ödənib. Nazirliyin binasının əsaslı təmirinə 200 min manat yönəldilib.

Qeyd edək ki, əməkdaşların mükafatlandırılması fondları həmçinin Ekologiya və Təbii Sərvətlər Nazirliyi, Baş Dövlət Yol Polisi İdarəsi, Dövlət Gömrük Komitəsi, Əmlak Məsələri Dövlət Komitəsini yanında Daşınmaz Əmlakın Dövlət Xidməti Reestr Xidməti, notarial kontorlarında da mövcuddur. 08B