Daha bir rayonda su təchizatı və kanalizasiya sisteminin yenidən qurulması həyata keçiriləcək

Yaxın vaxtlarda “Azərsu” ASC Qobustan şəhərində su təchizatı və kanalizasiya şəbəkələrinin  yenidən qurulması layihəsinin icrasına başlayacaq. Bu, Azərbaycan Respublikası hökuməti və Yaponiya Beynəlxalq Əməkdaşlıq Agentliyinin (YBƏA) birgə maliyyələşdirdiyi  “Kiçik şəhərlərdə su təchizatı və kanalizasiya  layihəsi”ndə nəzərdə tutulan 7 rayondan biridir.

Layihə 7 rayonu əhatə edir, bunun 4-də (Qusar, Xaçmaz, Xızı, Naftalan) su təchizatı və kanalizasiya sistemlərinin yenidən qurulması işləri davam etdirilir. Layihədə Yevlax və Bərdənin su təchizatı və kanalizasiya sistemlərinin yenidən qurulması da nəzərdə tutulub, deyə “Azərsu”da Turan-a bildiriblər. 

Azərbaycan Respublikası Hökuməti və Yaponiya Beynəlxalq Əməkdaşlıq Agentliyi arasında “Kiçik şəhərlərdə su təchizatı və kanalizasiya layihəsi”nə dair Kredit Sazişi  29 may 2009-cu il tarixdə imzalanıb. Sazişə əsasən, Yaponiya tərəfi görüləcək işlərə 400 milyon ABŞ dolları kredit ayıracaq.

İlkin olaraq layihəyə Şirvan, neftçala və Salyan da daxil idi. Sonradan bu rayonlar layihədən çıxarılıb. Azərbaycan hökumətinin payı 10-20%-dir.

2006-cı ildən Azərbaycan hökuməti su təchizatı və kanalizasiya sisteminin yenidən qurulmasına xüsusi diqqət ayırır. Bakıya Oğuzdan su kəməri çəkilib. O, saniyədə 5 m3 su verməlidir və 1 mlrd dollara başa gəlib. 23 rayonda su təchizatı və kanalizasiya sisteminin yenidən qurulması üzrə irimiqyaslı işlər aparılır. Bu məqsədlə Dünya Bankı, Asiya İnkişaf Bankı, KfW və başqa təşkilatlardan kreditlər alınıb. Bu il “Azərsu” ASC bu məqsədlə büdcədən 734,4 mln manat alacaq. 08D