Daşkəsən Filizsaflaşdırma Kombinatı özəlləşdirilməyə çıxarılır

 Prezident İlham Əliyev iyulun 13-də «Azərbaycan Respublikasının metallurgiya kompleksində sağlamlaşdırma və restrukturizasiya tədbirlərinin həyata keçirilməsi haqqında” Sərəncam imzalayıb. Sərəncama əsasən, Daşkəsən Filizsaflaşdırma Kombinatı üçüncü dəfə özəlləşdirilməyə çıxarılır.

Müəssisə «Azərbaycan Polad İstehsalı Kompleksi» dövlət QSC-nin strukturundan çıxarılır və Əmlak Komitəsinin sərəncamına verilir. Təhvil-təslim bir aya başa çatdırılmalıdır.

Müəssisənin özəlləşdirilməsi investisiya müsabiqəsi vasitəsilə həyata kçeiriləcək.

Bu məqsədlə nüfuzlu məsləhətçi şirkət cəlb ediləcək. Səhmlərin özəlləşdirilməsində yerli investorlarla yanaşı xarici investorların da iştirakına icazə verilir.

Dövlət “Daşkəsən Filizsaflaşdırma” ASC-də 97% səhm sahibidir. Qalan 3% əmək kollektivinə məxsusdur.

2003-2008-ci illərdə “Daşkəsən Filizsaflaşdırma” ASC 2 dəfə müsabiqəyə çıxarılıb. Dövlətlə səhmlərin alqı-satqısı haqqında müqavilələr məhkəmə qaydasında ləğv edilib.

«Azərbaycan Polad İstehsalı Kompleksi» QSC 2013-cü aprelində yaradılıb. Onun aktivində cəmi bir struktur olub - “Daşkəsən Filizsaflaşdırma” ASC. 08D