Dövlət büdcəsində neftin qiyməti $80-$90-dır

2015-ci il üçün Azərbaycanın dövlət büdcəsində neftin qiyməti $80-$90 olacaq.

Planlaşdırılan qiymət barədə rəsmi informasiya olmasa da, ötən il parlamentdə 2014-cü ilin dövlət büdcəsi müzakirə ediləndə iqtisadiyyat və sənaye nazirinin müavini Sevinc Həsənova demişdi ki, 2015-2017-ci illərdə baza qiyməti $80 nəzərdə tutulub. Turan-ın əldə etdiyi qeyri-rəsmi məlumata görə, hökumət Rusiyadan nümunə götürəcək. Orda baza qiyməti $87-$90 planlaşdırılır.

2015-2017-ci illər üçün sosial-iqtisadi inkişaf üzrə dövlət Proqramı ilə müşayiət edilən dövlət büdcəsi və icmal büdcəsi Maliyyə Nazirliyi və Nazirlər Kabineti tərəfindən təsdiq edilib və dövlət başçısının təsdiqini gözləyir.

Büdcənin gəlirlər hissəsi açıqlanmasa da, Vergilər Nazirliyi 5% artım gözləyir. Dövlət büdcəsinin gəlirləri ÜDM-in 30%-i qədər olacaq. ÜDM 62,9 mlrd manat ($80,4 mlrd) təşkil edəcək.

Neft gəlirləri azaldığı üçün vergi yığımına diqqət artırılacaq, nəzarət gücləndiriləcək. Hökumət qeyri-neft sektorunda 9% artım gözləyir. 2014-cü ildə qeyri-neft sektorunda 10% artım planlaşdırılırdı, amma 8 ayda 6,3% artım var.

2014-cü ildə dövlət büdcəsinin gəlirləri 18 384 mln manat, xərcləri 20 063 mln manat nəzərdə tutulub.

Dövlət büdcəsinin kəsiri 1 679 mln manat, icmal büdcənin kəsiri (ARDNF transfertləri nəzərə alınmadan) 14 084,9 мmln manat proqnozlaşdırılıb.—0—