Düzgün olmayan qiymət siyasəti pambıq becərilməsini azaldıb

Bu il Azərbaycanda  pambıq sahələri 23 min hektar olub. Bu, 2012-ci ildəkindən 21,3% azdır, deyə Dövlətstatkomda Turan-a bildiriblər. Ötən il  pambıq sahələri 29 217 ha olub.

Son 10 ildə inhisarçıların pambığı ucuz alması nəticəsində fermerlərin pambıqçılığa marağı azalıb. Nəticədə pambıq əkinləri minimuma enib və 2009-cu ildə 21,1 min ha-dan məhsul yğılıb. 2012-ci il üçün vəziyyət bor qədər yaxşılaşıb və 56,8 min ton pambıq toplanıb. Amma sahələrin azalması göstərir ki, istehsal yenə azalacaq.

Kənd Təsərrüfatı Nazirliyində Turan-a bildiriblər ki, bu il pambıqtəmizləmə zavodları fermerlərlə ötən ilki qədər pambıq almaq üçün müqavilə bağlayıblar: bir tonu orta hesabla 410-420 manat. Pambıq şirkətlərində hesab edirlər ki, bu, çox yüksək qiymətdir.

Onlar qismən haqlıdır. 6 may 2013-cü il üçün 1 ton pambıq lifi dünya bazarında $2500 (1950 manat) olub və artır. Azərbaycanda isə pambıq lifi 1500 manat və ya $1900-dır. Son illər dünya bazarında qiymətlər 1 ton üçün $5000 olub. İki il əvvəl ilk dəfə $3 900, sonra isə $2000-a düşüb. Amma onda da Azərbaycanda pambıq ucuz qiymətə alınıb.

İlkin məlumata görə, 2013-14-cü illərdə dünyada pambıq istehsalı 10,9% azalaraq 23,07 mln ton olacaq. Tələbat isə 4,9% artaraq 24,25 mln tona çatacaq. Demək, qiymətlər artacaq. 2013-14-cü il mövsümünün sonu üçün dünya ehtiyatları 11,8% azalaraq 15,31 mln ton olacaq. Ehtiyatların tələbata nisbəti 63% təşkil edəcək. --08B—