Əhali yeni tarifləri sürücülərdən öyrənir

Tarif (qiymət) Şurası sentyabrın 5-də bir sıra şəhərətrafı marşrutlarda gediş haqqına yenidən baxıb. Amma qəribə də olsa, Şura qərar barədə məlumat yaymayıb və əhali yeni tarifləri sürücülərdən öyrənib.

TŞ-nın sentyabrın 6-da qüvvəyə minən qərarına əsasən, 15-25 km uzunluğunda avtobus marşrutlarının sayı 45-dən 53-ə artırılıb. Bu avtobuslarda gediş haqqı 25 qəpikdir. Əvvəllər 11 marşrutda gediş haqqı 35 qəpik (uzunluğu 40 km-dək) idi, 5 sentyabrda bu siyahıya 2 marşrut əlavə edilib (100, 107, 126, 136, 141, 149, 157, 172, 194, 196, 197, 200, 212). Sərnişinlər daha bir marşrutda 50 qəpik ödəyəcək və indi 3 marşrutda gediş haqqı bu qədərdir (101, 164, 171).

Sərnişinlərə yaxşı xəbər də var: əvvəllər 20 marşrutda 30 qəpik ödənilirdi (25-30 km), indi 5 marşrut bu siyahıdan çıxarılıb.   

26 dekabr 2005-ci il tarixli «TŞ haqqında Əsasnamə»yə əsasən, TŞ katibliyi dövlət qiymət tənzimlənməsinin vacibliyi, məqsədi və nəticələri bgarədə KİV vasitəsi ilə əhalini məlumatlandırmalıdır.

İqtisadiyyat və Sənaye Nazirliyinin (bu qurumun rəhbəri TŞ-nın sədridir) mətbuat xidmətinin rəhbəri Abbas Əliyev saytlardan birinə deyib ki, tariflərə yenidən baxılması bir sıra marşrutların uzunluğunun dəyişməsi ilə bağlıdır.

Son dəfə TŞ avtobuslarda gediş haqqına 2013-cü ilin mayında baxıb. 08B