Ekspert: «Azərbaycanın tədiyyə balansının təhlili vəziyyətin pisləşdiyini göstərir»

2016-cı ilin birinci yarısında tədiyyə balansının kəsiri 1,8 mlrd. dollar təşkil edib. Halbuki, ötən ilin analoji dövründə 99 mln. dollar məbləğində profisit olub. Bunu iqtisadçı Samir Əliyev bildirib.

Turan məlumat verir ki, 2016-cı ilin birinci rübündə  kəsir $1,1 milyard olub. 

Ekspert qeyd edib ki, cari hesablar balansının kəsiri getdikcə böyüyür. Tədiyyə balansında həmişə profisit yaradan yeganə mənbə - cari hesablar balansı bu dəfə də ümidləri doğrulda bilməyib

“Neftin ucuzlaşması və qeyri-neft ixracının azalması səbəbindən cari hesablar balansında 2016-cı ilin 2-ci rübü 802 milyon dollara çatıb. Yəni, ölkəyə gələn valyutadan 802 milyon dolları artıq geri qaytarmışıq. Halbuki, 2015-i ilin müvafiq dövründə cari hesablar balansında 63,3 milyon dollar məbləğində profisit qeydə alınıb. 

Digər  səbəb kimi qeyri-neft ixracının azalması göstərilib. 2015-ci ilin yanvar-iyun ayı ilə müqayisədə qeyri-neft ixracı 34% azalaraq 827,1 milyon dollardan 544,9 milyon dollara düşüb.

S.Əliyev qeyd edib ki, turizm və tikinti xidmətlərində kəsir azalır. “Ərəb turistlərinin son aylar ölkəmizə axını və Formula 1 yarışı turizm sferasına töhfə versə də bu turizm xidmətlərindəki kəsiri örtməyə kifayət etməyib. Ötən ilin birinci yarısında ölkəmizə gələn turistlərin göstərdiyimiz xidmətlərə görə $1,10 milyard ödədiyi halda bu ilin müvafiq dövründə $1.19 milyard ödəyiblər. Ancaq turizm xidmətlərində kəsir $118,4 milyondan $32 milyona qədər azalıb. Tikinti xidmətlərində də kəsir azalıb. Bir il öncəki dövrdə $1,9 milyarddan $1,5 milyarda düşüb.

Ümumilikdə, ekspertin fikrincə, ölkənin tədiyyə balansının təhlili vəziyyətin pisləşdiyini göstərir.–71B-