Elman Rüstəmov bildirir ki, kəskin devalvasiya olmayacaq

Bakı/27.09.16/Turan: Maliyyə Sabitliyi Şurası manatın davamlı olması üçün lazımi addımları atır. Bunu Azərbaycan Mərkəzi Bankının rəhbəri Elman Rüstəmov jurnalistlərə bildirib.

Onun sözlərinə görə, bu gün milli valyutanın məzənnəsi “idarə edilən üzən rejim əsasında formalaşıb”.

“Bu ilin doqquz ayı ərzində manatın məzənnəsi ilin əvvəli ilə müqayisədə 5% dəyişikliyə məruz qalıb”, - E.Rüstəmov vurğulayıb.

Əsas məqsəd hazırda 11% təşkil edən ikirəqəmli inflyasiyanın azaldılmasıdır.

“Yüksək inflyasiya və devalvasiya iqtisadiyyatın bütün subyektlərinə ziyan vurur. Ancaq biz nikbinik. Vəziyyətin gərgin olmasına baxmayaraq, biz onu nəzarətdə saxlayırıq və idarə edirik”, - AMB rəhbəri bildirib.

E.Rüstəmov qeyd edib ki, ödəniş balansında 6 mlrd. manat mənfi saldı böyük gərginlik yaradır, valyuta ehtiyatlarına və manatın məzənnəsinə təzyiq göstərir.

“Valyuta məzənnəsinin idarə edilməsi ödəniş balansında mənfi saldo yaradan proseslərin də idarə edilməsi deməkdir”, - E.Rüstəmov vurğulayıb.

Milli valyutanın mümkün devalvasiyasına toxunan AMB sədri bildirib ki, bu barədə söhbətlərin əsası yoxdur.

“Sonuncu valyuta hərracında tələbat təklifdən çox aşağı olub ki, bu da göstərir ki, dövlət bazara lazımi həcmdə valyuta çıxarır. Qarşıdakı kəskin devalvasiya barədə söz-söhbətlərin heç bir əsası yoxdur”, - o bildirib.-71B-