E.Rüstəmov: Neft qiymətləri ucuzlaşarsa manatın yenidən devalvasiyası qaçılmazdır

Dünyada neft qiymətləri kəskin şəkildə ucuzlaşarsa, bu Azərbaycan milli valyutasının kursuna da təsir edəcək. Bu barədə bu gün Azərbaycan Mərkəzi Bankının (AMB) İdarə Heyətinin sədri Elman Rüstəmov iqtisadi siyasət üzrə parlament komitəsinin iclasında çıxış edərkən bildirib.

Onun sözlərinə görə, hazırda manatın yeni devalvasiyası gözlənilmir, amma neft qiymətləri kəskin şəkildə düşərsə, manat bu şəraitə uyğunlaşdırılacaq.

Ən böyük maliyyə müəssisələrinin proqnozlarına istinad edərək Rüstəmov bildirib ki, neftin bir barelinin qiyməti uzun müddət 50-55 dollar səviyyəsində olacaq.

Bundan irəli gələrək 2016-cı il üçün Azərbaycanın dövlət büdcəsi bir bareli qiyməti 50 dollardan nəzərdə tutulmaqla tərtib ediləcək, deyə Rüstəmov bildirib.

Fevralın 21-də manatın devalvasiyasına toxunan deputat bildirib ki, bu, dünyada neft qiymətlərinin kəskin şəkildə ucuzlaşmasının nəticəsi olub.

Daha sonra o deyib ki, gələcəkdə AMB manatın üzən məzənnəsi rejiminə keçməyi planlaşdırır. İndi bu, məntiqəuyğun görünmür, belə ki, ölkədə böyük valyuta vəsaitləri qazanan üç təşkilat var – Dövlət Neft Fondu, Mərkəzi Bank və SOCAR.

Hazırki şəraitdə üzən məzənnə rejiminə keçid manatın kursunun bu və ya digər istiqamətdə kəskin dəyişməsinə səbəb ola bilər ki, bu da iqtisadiyyata mənfi təsir göstərəcək.

Rüstəmov həmçinin qeyd edib ki, Azərbaycanda dollarlaşma prosesi davam edir. Onun sözlərinə görə, fevralda manatın devalvasiyasından sonra AMB manatın hazırki kursunu qoruyub saxlamaq üçün bazarda 1 mlrd. dollardan çox vəsait satıb.

Rüstəmov hesab edir ki, aprel-may aylarında da dollarlaşma prosesi daha az templərlə davam edəcək və getdikcə zəifləyəcək. -06D-