«Gaz de France» şirkəti 65 milyard kubmetr Azərbaycan qazı alacaq

Fransanın “Gaz de France” şirkəti “Şahdəniz-2” yatağından hasil edilən 65 milyard kubmetr Azərbaycan qazı alacaq.

Bu sözləri energetika naziri Natiq Əliyev deyib. Ötən cümə günü Əliyev Fransanın Azərbaycandakı səfiri xanım Orelia Buşez ilə görüşüb.

Nazir görüş zamanı qeyd edib ki, Fransa şirkətləri Azərbaycanın neft-qaz və neft məhsulları sənayesində yaxından iştirak edirlər. Belə ki, “Total” şirkəti Bakı-Tbilisi-Ceyhan neft kəmərini idarə edən konsorsiumun 5 faizinə və “Cənubi Qafqaz Boru Kəmərinin Genişləndirilməsi” layihəsində isə 10 faizlik iştirak payına malikdir. Bundan başqa, “Total” və “Gaz de France” şirkətləri ilə “Abşeron” yatağı üzrə əməkdaşlıq enerji sahəsindəki əlaqələrə töhfədir.

Nazir deyib ki, Azərbaycan “Şahdəniz” yatağının işlənməsinin ikinci mərhələsindən hasil ediləcək qazın satışı üçün 9 şirkətlə saziş bağlayıb. Onların arasında ən böyük alıcı “Gaz de France” şirkətidir. Şirkət 65 milyard kubmetr Azərbaycan qazı alacaq.

Səfir Orelia Buşez Fransa şirkətlərininn Azərbaycanın energetika sektoruna marağını vurğulayıb. Xüsusən “Air Liquide” və “Axens” şirkətlərinin Azərbaycanda layihələrdə iştirak edir. Onun sözlərinə görə, hazırda yeni enerji sahələrinin müəyyənləşdirilməsinə güclü diqqət var: “Azərbaycanda yeni enerji sahələrinin tədqiqatı məqsədilə Fransadan bir qrup mütəxəssisin səfəri planlaşdırılır”. –0—