Hava şəraiti üzündən Bakı və Abşeron enerji problemi ilə üzləşib

Fevralın 1-də Bakının 6 rayonu sutka ərzində qazı fasilələrlə alıb. 

ARDNŞ-nin məlumatına görə, buna səbəb Digah-Böyük Şor magistral qaz kəmərində qəzadır. 

Məlumata görə, təmir işləri ilə bağlı 1 fevral saat 10-dan Bakının 6 rayonuna qaz verilməsində məhdudiyyət olub..

"Nərimanov, Nizami, Binəqədi, Sabunçu, Nəsimi və Xətai rayonlarına qaz fasilələrlə veriləcək ", - deyə ARDNŞ-nin məlumatında bildirilib. 

“Azəriqaz” İB əmin edib ki, bir neçə saata nasazlıq aradan qaldırılacaq və qaz tam həcmdə veriləcək. 

Amma Turan-ın sosial şəbəkələrdə müşahidəsi göstərib ki, fevralın 2-də də abunəçilər qazı fasilə ilə alıb. 

ARDNŞ-nin məlumatında o fakt da diqqəti cəlb edib ki, “Bakı rayonlarına və respublika regionlarına qaz verilməsindəki məhdudiyyətlər qazlaşdırma işi və təchizatın yaxşılaşdırılması ilə bağlıdır”. 

Aydın deyil, nəyə görə     “Azəriqaz” anomal soyuqlar zamanı qazlaşdırma işi və təchizatın yaxşılaşdırılması ilə məşğul olur. Axı hidrometeoroloqlar 4 gün əvvəl əlverişsiz hava xəbərdarlığı etmişdi. 

Digər tərəfdən, Digah-Böyük Şor magistral qaz kəmərində niyə qəza baş verib? “Azəriqaz”ın mənbələrindən verilən məlumata görə, 31 yanvarda soyuq hava ilə bağlı qaz tədarükü 11,4% artıb. Ümumi həcmin 17,9 mln m3-i Bakıya, 11,4 mln m3-i rayonlara verilib. Bu yükə Digah-Böyük Şor davam gətirə bilməyib. 

31 yanvar və 1 fevralda “Bakıelektrikşəbəkə” də abunəçilər qarşısında öhdəliyə əməl etməyib. Xüsusən şəhərətrafında gecələr işıqlar sönüb. 

Xatırladaq ki, Bakı və Abşeron sonuncu dəfə 2012-ci ilin yanvar-fevralında enerji problemi ilə üzləşib. O vaxt havanın temperaturu mənfi 13 dərəcəyə düşmüşdü. –12А--