Hökumət ilk dəfə Vətəndaşın büdcə bələdçisini dərc edib

Maliyyə Nazirliyi ilk dəfə öz saytında “Azərbaycan Respublikasının 2014-cü il dövlət və icmal büdcələri üzrə Vətəndaşın büdcə bələdçisi”ni yerləşdirib. Ekspertlər bu sənədin açıqlamasını ölkədə büdcə məlumatlarının əlçatanlığı və büdcə şəffaflığı ilə bağlı beynəlxalq normaların tətbiq olunması baxımından irəliyə doğru atılmış bir addım hesab edirlər. 

Sənəd 65 səhifədən ibarətdir və anlaşılan və qeyri-texniki bir dildə vətəndaşlara önümüzdəki ilin büdcəsi ilə bağlı ətraflı məlumat verməyi nəzərdə tutur. Əvvəlki illərdə belə sənədi «Milli Büdcə Qrupu» (MBQ) hazırlamışdı. 

2012-ci ildə Azərbaycanda büdcə açıqlığı indeksi 100 mümkün baldan 42 bal təşkil edib. Bu istiqamətdə tədqiqatı IBP (Internatinal Budget Partnership) təşkilatı aparır. Büdcə açıqlığı indeksi iki ildə bir tərtib edilir. Qazaxıstanda bu göstərici 38, Ukraynada 62, Rusiya və Monqolustanda 60, Gürcüstanda 55 bal olub. 

MBQ eksperti Kənan Aslanlı Turan-a bildirib ki, Azərbaycanın büdcə açıqlığı indeksində irəliləməsi üçün amillərdən biri Vətəndaşın büdcə bələdçisinin tərtib və  dərc edilməsidir. Amma bu istiqamətdə potensial bitməyib. «Maliyyə Nazirliyi büdcə prosesində vətəndaş cəmiyyəti və medianın iştirakçılığının təmin edilməsi istiqamətində də addımlar ata bilər», deyə Aslanlı qeyd edib. 

Büdcə açıqlığı indeksi üzrə 41-60 bal toplayan ölkələr vətəndaşlara cüzi informasiay verən sayılırlar. Bu kaeqoriyaya İtaliya, Polşa, Türkiyə də daxildir. Büdcə açıqlığı indeksi informasiyanın kəmiyyət və keyfiyyət xarakteini də qiymətləndirir. Bu indeks həmçinin ölkə vətəndaşlarına büdcə prosesində iştirak imkanı verir.  08B