Hökumət yerli avtomobil yolları barədə qərara gəlib

Oktyabrın 20-də hökumət avtomobil yollarının kimə aid olmasında bələdiyyələrin müstəsna səlahiyyəti barədə qərara gəlib.

Dövlət başçısı İlham Əliyevin oktyabrın 20-də verdiyi sərəncamla şəhər və kəndlərdə avtomobil yolları ilə bağlı icra hakimiyyəti və bələdiyyələrin səlahiyyətinin müəyyən edən sənədə («Azərbaycan Respublikasının nəqliyyat-yol kompleksində idarəetmənin təkmilləşdirilməsi tədbirləri haqqında”, 2007-ci il 22 fevral) dəyişiklik edilib. Bu sənədə 2008-ci ilin iyununda dəyişiklik edilsə də, yerli avtomobil yollarının kimə mənsub olması məsələsi açıq qalıb. Məsələ burasındadır ki, Bakıda şəhər avtomobil yolları Nəqliyyat Nazirliyinin balansına verilib. Bakı, şəhər və rayonlarda digər yollar yerli İH və bələdiyyələrin birgə istifadəsindədir. Faktik olaraq onları İH istismar edir, maliyyələşmə isə dövlət büdcəsindəndir.

Son dəyişikliklə şəhər avtomobil yolları yerli İH-nin, məhəllədaxili, kənd, qəsəbə yolları, keçid, ictimai nəqliyyat yolu və s. bələdiyyələrin balansına verilib.

 «İqtisadi Təşəbbüslərə Yardım» İB-nin eksperti Samir Əliyev bu addımı Avropа Şurasının Konqresinin 2012-ci il tarixli tövsiyəsinin icrası kimi baxır. «Hakimiyyətin qərarı bələdiyyələrin müstəsna səlahiyyətlərindən biri üzrə qeyri-müəyyənliyə son qoydu», deyə o bildirib. Ekspert hesab edir ki, məsələ bitməyib. Bələdiyyələr müvafiq maliyyə resusru ilə təmin edilməlidir.. «Bələdiyyələrin statusu haqqında» (maddə 42) qanuna görə, qanunverici və icra orqanı bələdiyyələrə əlavə səlahiyyət veriləndə məsələnin maliyyə tərəfinə də baxmalıdır. Amma 2015-ci ilin büdcə layihəsində  bələdiyyələrə dotasiya artırılmayıb», deyə Əliyev qeyd edib.

Hökumət 2015-ci ildə bələdiyyələrə 5,2 mln manat ayıracaq. Növbəti bələdiyyə seçkiləri dekabrın 23-də olacaq. 08B