İdxal azalır, gömrük yığımı artır

Bu ilin 2 ayında Azərbaycana əmtəə idxalı qiymət ifadəsində 7,5% azalıb. Amma gömrük xidməti gömrük yığımını 9,5% artırıb.

Gömrük Komitəsinin məlumatına görə, bu ilin 2 ayında gömrükçülər dövlət büdcəsinə 196,6 mln manat təmin edib. Bu, ötən ilin eyni dövründəkindən 17 mln manat çoxdur. Mədaxil ƏDV (13,2%), gömrük idxal vergisi (2,5 mln manat) və aksizlər hesabına artıb – 1,5 mln manat.

Martın 13-də DGK sədri Aydın Əliyev Raca Almarqozi başda olmaqla Beynəlxalq Valyuta Fondunun nümayəndə heyətini qəbul edib və gömrük orqanlarında islahatlardan danışıb. BVF təmsilçisi isə Azərbaycan gömrüyündəki uğurlardan məmnunluq bildirib, deyə DGK-nın məlumatında bildirilir.

Tərəflər Azərbaycanın Beynəlxalq Ticarət Təşkilatına qəbulu məsələsini də müzakirə edib. Xatırladaq ki, Azərbaycan hakimiyyəti bu il qəti bildirib ki, yaxın illərdə ÜTT-yə daxil olmayacaq. Gömrük qanunvericiliyinin təkmilləşdirilməsinə və İKT tətbiqinə baxmayaraq, yerli və beynəlxalq ekspertlər bu strukturda yüksək korrupsiya olduğunu bildirir.

Bu il gömrükçülər dövlət büdcəsinə  1 510 mln manat təmin edəcək. Bu, 2013-cü ildəkindən 9,4% çoxdur. 08B