İKT sahəsində sahibkarların qeydiyyatı və reyestrinin aparılması qaydası təsdiq edilib

Nazirlər Kabineti texnoparkların rezidentlərinin və biznes inkubatorların fəaliyyətinin tənzimlənməsi, onların qeydiyyat şəhadətnamələrinin forması və qeydiyyatdan keçmək üçün ərizə formasını təsdiq edib.

İnkubatorda fəaliyyət göstərmək üçün hüquqi və fiziki şəxslər inkubatorun rezidenti kimi qeydiyyatdan keçməli və inkubatorun qeydiyyat şəhadətnaməsini almalıdırlar. Hüquqi və fiziki şəxslər inkubatorun rezidenti kimi qeydiyyatdan keçmək üçün elektron və ya yazılı ərizə ilə idarəedici təşkilata müraciət edirlər

Ərizədə ərizəçinin adı ilə yanaşı innovasiya layihəsinin adı və qısa məzmunu, innovasiya layihəsi üzrə inkubatorda fəaliyyət göstərəcək şəxslərin siyahısı, sahibkarlıq fəaliyyəti barədə məlumat (əgər varsa), innovasiya layihəsinin biznes-planı, innovasiya layihəsinin ətraflı məzmununu əks etdirən və müvafiq proqram təminatında hazırlanmış təqdimat əksini tapmalıdır.

Qaydalara əsasən, texnopark rezidentinin və biznes inkubatorun qeydiyyat prosesi müvafiq ərizə verildikdən sonra 20 (iyirmi) iş günü müddətində aparılmalıdır. Rezidentlər qeydiyyat haqqında şəhadətnamə aldıqdan sonra biznes inkubatorun operatoru ilə torpaq sahəsinin icarəsinə dair müqavilə bağlamalıdırlar.

Texnoparkın (inkubatorun) rezidentlərinin reyestrində hüquqi şəxs olan rezidentin tam adı və təşkilati-hüquqi forması, vergi ödəyicisinineyniləşdirmə nömrəsi (VÖEN), reyestr məlumatlarında edilmiş dəyişikliklər, rezidentin texnoparkda (inkubatorda) qeydiyyata alınması və qeydiyyatının ləğvi haqqında qərarın tarixi və nömrəsi və s əksini tapmalıdır.
Rezidentlər haqqında informasiya iki gün ərzində Vergilər Nazirliyinə və Dövlət Gömrük Komitəsinə rəsmi məlumat təqdim edilməlidir. --17D—