Istehsalatda bədbəxt hadisələr üzrə ödənişlər azalıb

Azərbaycan sığortaçıları yanvar-fevralda istehsalatda bədbəxt hadisələrdən icbari sığorta üzrə 5,6 mln sığorta haqları toplayıblar (ötən ilin eyni dövründəkindən 3,4% çox).

Azərbaycan Sığortaçılar Assosiasiyasının məlumatına görə, deyilən dövrdə sığorta ödənişləri 628,5 min manat (mənfi 58,8%) olub.

Azərbaycanda 3 sığorta şirkəti bu sığorta növü üzrə xidmətlər göstərir.

“İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” Qanun 2010-cu ilin iyul ayında təsdiq edilib. Həmin ilin dekabrında bu sığorta növü üzrə xidmətlərin göstərilməsi üçün normativ-hüquqi aktların təsdiq edilməsi prosesi başa çatıb.

Nazirlər Kabineti 2010-cu ilin noyabrında istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta tariflərini təsdiqləyib. Nazirlər Kabinetinin qərarına əsasən, iqtisadi fəaliyyətin bütün növləri 14 risk səviyyəsinə ayrılıb. Riskin bu səviyyəsindən irəli gələrək qulluqçular və fəhlələr üçün sığorta tarifinin həcmi müəssisənin risk səviyyəsindən asılı olaraq 0,2%-dən 2%-ə qədər təşkil edir. Qanuna əsasən, sığorta tarifi müəssisədə əmək haqqı fonduna hesablanır. Qanunda üç növ sığorta ödənişi nəzərdə tutulur: aylıq, birdəfəlik və əlavə. --17D—