Kinoteatrlara gələnlərin sayı 2 dəfə artıb

Bakı/19.09.16/Turan: Dövlət Statistika Komitəsi mədəniyyət və incəsənət müəssisələri ilə bağlı hesabat açıqlayıb. Hesabata əsasən, 2015-ci ildə kinoteatrlara gələnlərin sayı iki dəfədən çox artıb və 559,4 min nəfər təşkil edib.

DSK-nin məlumatına görə, Azərbaycanda 28 kinozalı olan 10 kinoteatr fəaliyyət göstərir. 2015-ci ildə 3 kinoteatr istismara verilib.

Kinoteatrlar Bakıda cəmlənib. Paytaxtda 26 kinozalı olan 8 dövlət və özəl kinoteatr var.

Bakıda kinoteatrlara getmə göstəricisi belədir:

Binəqədi rayonu – 287,7 min tamaşaçı;

Nəsimi rayonu – 245,4 min tamaşaçı;

Səbail rayonu – 8,5 min tamaşaçı;

Nizami rayonu – 1,6 min tamaşaçı.

Maraqlıdır ki, Dövlət Statistika Komitəsinin kinoteatrların mülkiyyət formasına görə sayı ilə bağlı məlumatı bazardakı real mənzərə ilə üst üstə düşmür. Məsələn, “Park Cinema”  (http://parkcinema.az/kinoteatrlar) beş kinoteatra (Park bulvar, Metro Park, Flame Towers, Zagulba və Amburan), “CinemaPlus” isə (http://cinemaplus.az/) üç kinoteatra (28 Mall, Amburan Mall və Khamsa Park-Gəncə) malik olduğunu deyir.

Qeyd edək ki, kinoteatrlarda rəsmən 4633 yer var, 2014-cü ildə 25,5% artım olub. Üç dövlət kinoteatrının payına 1807 yer düşür. 2015-ci ildə dövlət kinoteatrlarına 165 min tamaçağı gedib. Bu, əvvəlki ildəkinn 10,3 min nəfər çoxdur. Özəl kinoteatrlara gedənlərin sayı 313,3 min artıb. Bu da böyük ehtimalla onların gəlirlərinin leqallaşması ilə bağlıdır. 08B