Kommersiya bankları valyuta satışını bərpa etməyib

Azərbaycanın əksər kommersiya bankları çərşənbə günü dollar satışını bərpa etməyib.

Turan-ın məlumatına görə, həftənin əvvəlindən etibarən bir çox banklar valyuta satışını ciddi şəkildə məhdudlaşdırıb və ya ümumiyyətlə dayandırıb.

Dövlət Neft Fondu, demək olar ki, hər iş günü ölkə banklarına 50 mln. dollar satır. Amma valyuta defisiti aradan qalxmır. Bundan başqa, bank dairələrindən daxil olan məlumata görə, bankların Amerika dollarına olan tələbatı 10-12 dəfə çoxdur.

Çərşənbə günü Turan agentliyi kommersiya banklarına sorğu göndərib, onlar heç bir izahat vermədən dollar və avro satmadıqlarını təsdiq ediblər. “Respublika”, “Silkway”, “Standart” bildirib ki, onlarda satışda dollar yoxdur.

“Kapitalbank” və Accessbank”da deyiblər k, hər bir nəfərə 100 dollar satırlar.

“Paşabank”da qeyd ediblər ki, dolları yalnız öz müştərilərinə satırlar.

İqtisadi Araşdırmalar Mərkəzinin rəhbəri Qubad İbadoğlu vəziyyəti Turan-a şərh edərkən bildirib ki, satış məhdudiyyətinin devalvasiya gözlənilməsi ilə əlaqədar mərkəzləşmiş siyasətin nəticəsi hesab etmir.

“Əminəm ki, kommersiya banklarımızın əksəriyyətinin nəinki uzunmüddətli, qısamüddətli siyasəti belə yoxdur. Valyuta satışının dayandırılması o demək deyil ki, onlarda dollar yoxdur. Sadəcə olaraq, onlar mümkün devalvasiyadan sığortalanmağın ən sadə yolunu seçiblər”, deyə İbadoğlu qeyd edib.

Ekspert bankların Mərkəzi Bankdan informasiya sızıntısı ala biləcəyi ehtimalını təkzib edib. “Belə bir sızıntı dövlətə xəyanətlə eyni şeydir”, deyə o bildirib. -74В-