Korporativ və icbari sığorta hansı şirkətləriə xeyir verir?

Yanvar-iyulda ölkənin sığorta şirkətləri 228,97 mln manat toplayıb. 2012-ci ilin I yarısında bu göstərici 201,51 mln manat idi. Artım korporativ və icbari sığortanın hesabınadır. 

Lider “Paşa Sığorta” 1 avqust üçün 30 mln 854,81 min manat toplayıb. Bu, ötən ilkindən 2,7 mln çoxdur və 28 şirkətin topladığı mükafatın 13,5%-i qədərdir. Şirkətin xüsusi çəkisi ay ərzində 1% azalıb. Onun törəməsi “Paşa həyat Sığorta” 17,99 mln manatla beşincidir. 

FHN və Sərhəd Xidməti əməkdaşlarının sığortalanması haqqında dövlət başçısının fərmanı sayəsində “AzərSığorta” 23,79 mln manatla (ay ərzində 5 mln artım) üçüncüdür. 

FHN rəhbərinin “AzSığorta” şirkəti nəhayət, ikinci yerə qalxıb. O, 25,63 mln manat mükafat yığıb.

Məmur rəqiblərin bu tempi və ötən illə müqayisədə geriləmə nəticəsində (20,48 əvəzinə 20,34 mln manat) daim bürünc “Atəşgah” 4-cü yerə düşüb. Həyat sığortasının əski lideri “Atəşgah Həyat Sığorta” 16,26 mln-la tərəfdaşından geri qalır.  

Siyahının aşağısında bir qədər rotasiya var. AXA MBASK bir neçə pillə qalxıb. 

Ödənişlər üzrə “Paşa Sığorta” liderdir. O, yarım ildə 15,52 mln manat ödəniş edib. Ödənişlərin 22,5%-i onun payına düşür. Mükafatlar kimi onun xərclərinin çoxu da könüllü tibbi sığorta (əsasən, ARDNŞ hesabına) üzrədir. 

Ümumilikdə şirkətlər 68,88 mln manat ödəniş edib. Bu, ötən ilin eyni dövründəkindən (49,47 mln) 19,4 mln manat çoxdur. --17D—