Latviya Azərbaycanla birgə iqtisadi layihələri dəstəkləyir

Riqa şəhərində Azərbaycan və Latviya arasında İqtisadi, Elmi, Texniki və Mədəni Əməkdaşlıq üzrə Hökumətlərarası Komissiyanın altıncı iclası keçirilib, - deyə Latviyanın Azərbaycandakı səfirliyi məlumat yayıb.

Avropa İttifaqının daha bir ölkəsi rəsmi Bakıya ekoloji təmiz texnologiyalar, qida sənayesi, əczaçılıq, turizm sahələrində əməkdaşlıq təklif edir.

Latviyanın nəqliyyat naziri Uldis Auqulisin sözlərinə görə, ikitərəfli ticarət dövriyyəsinin artırılması, birgə investisiya layihələri, beynəlxalq nəqliyyat dəhlizlərindən istifadə, rabitə və təhsil, kənd təsərrüfatı, tikinti, turizm və səhiyyə prioritet sahələrdir. Bundan başqa, Azərbaycan tranzit və logistika üzrə vacib tərəfdaşdır, çünki hər iki tərəf «İpək Yolu» və «Şimal-Cənub» dəhlizinin vacib hissəsidir.

Dövlətstatkoma görə, ötən il Latviya ilə Azərbaycan arasında ticarət dövriyyəsi $9 mln təşkil edib. Azərbaycanda Latviya kapitallı 20 şirkət var. Onlar ticarət, sənaye, tikinti və xidmət sahələrində fəaliyyət göstərir. --17D—