Mebel istehsalı 11,5% artıb

Bu ilin 8 ayında Azərbaycanda 20,5 mln manat qiymətində mebel istehsal edilib. Bu, ötən ilin eyni dövründəkindən 11,5% çoxdur. Mebel idxalı da artıb (+24,6%).

Mebel sənayesi vicdanlı rəqabət olan çox az fəaliyyət sahələridndəndir. Dövlətstatkoma görə, mebel sənayesində 84 şirkət fəaliyyət göstərir. 2013-cü ildə bu biznesə 12 hüquqi şəxs qoşulub. Mebel istehsalı ilə məşğul olan 800 fərdi sahibkar qeydiyyata alınıb.

2013-cü ildə ölkədə mebel istehsalının həcmi 43,9 mln manat olub. Bu, 2012-ci ildəkindən 5,9% çoxdur. Son 5 ildə ən yüksək istehsal həcmi 2010-cu ildə qeydə alınıb  – 51,5 mln manat. 2011-2013-cü illərdə bu sektora 65,5 mln manat investisiya qoyulub. Hazırda mebel sənayesində 4200 nəfər məşğuldur. Bu, 2005-ci ildəkindən 2,3 dəfə çoxdur.

Mebel sənayesinin lideri “ EMBAWOOD” MMC-dir. Şirkət bu il istiqraz yerləşdirməklə kapital bazarında 10 mln manat cəlb edib. EMBAWOOD-un Azərbaycanda 3, Gürcüstanda 2, Qazaxıstan və Ukraynanın hərəsində bir fabriki var. Mağaza sayı 220, o cümlədən Azərbaycanda 136-dır. 2012-ci ildə Azərbaycan ərazisində 44,4 mln, 2013-cü ildə 59,5 mln manatlıq mebel satıb. Şirkətdə qeyd edirlər ki, Azərbaycanda mebel satışı bazarının 20%-ə malikdirlər. Digər yerli mebel istehsalçıları bunlardır: “Yağmur” (ev mebeli), “Saloğlu” (ev mebeli), “Woodpacker” (ev mebeli), “Viva” (ev mebeli), “Green wood” (ev mebeli), “Dellora” (ev mebeli), “İstikbal” (ev mebeli), “Bellona” (ev mebeli), “Kelebek Mobilya” (ev mebeli), “Doğtaş” (ev mebeli), “Zivella” (ofis mebeli), “M line” (ofis mebeli) və s.

Bu ilin 8 ayında Azərbaycana $62,3 mln məbləğində mebel və onun hissələri idxal edilib. Ötən il idxal həcmi 13% azalaraq $87,2 mln olub. 08B