Mərkəzi Bank hərracda təklif edilən valyuta həcmini açıqlamaq istəmir

Oktyabrın əvvəlində qüvvəyə minən valyuta hərraclarının keçirilməsi qaydalarına dəyişikliyə əsasən, banklar hərracda xarici valyuta sata bilər.  

Həmin qaydalara əsasən, hər bir hərrac barədə ayrıca məlumat verilmir. Mərkəzi Bank yalnız manatın məzənnəsi, hərracın başlanması və sonu barədə məlumat verir. Mərkəzi Bank və Neft Fondunun hərracda təklif etdiyi valyuta həcmi açıqlanmır, bu isə statistika üçün çətinlik yaradır.

Turan-ın bu məsələ ilə bağlı Mərkəzi Bankdan informasiya sorğusu cavabsız qalıb. Maliyyə eksperti Əkrəm Həsənov hesab edir ki, işlər yaxşı getmir və qeyri-şəffaflıq bununla bağlıdır.

«Demək, gizləməli nəsə var. Valyutanın məzənnəsi inzibati yolla müəyyən olunur. Hərrac oyundur. Yoxsa informasiya açıq olardı. Hərrac haqda bütün informasiya açıqalansa, məlum olar ki, valyutanın məzənnəsi sünidir», deyə o bildirir.   

Neft Fondu bildirir ki, oktyabrda hərracda $371 mln satıb.

AMB həmin ayda valyuta bazarına $127 mln çıxarıb.   

Oktyabrda 7 valyuta hərracı keçirilib. Dolların məzənnəsi oktyabrın 3-də 1,6170 manat, 18 oktyabrda 1,5969 manat olub.

19 oktyabrdan dolların məzənnəsi artmağa başlayıb və 31 oktyabrda 1,6381 manat olub. 

Yeni qaydalara qədər valyuta bazarı daha şəffaf olub. Belə ki, sentyabrda 8 hərrac keçirilib, ARDNF və AMB $1 mlrd 150 mln ($850 mln və  $300 mln) valyuta təklif edib.

$731 mln  ($631 mln ARDNF, $100 mln AMB) valyuta satılıb.

Sentyabrda dollara tələb $1 mlrd 321 mln 57 min olub. 71D