Mükafatların üçdə ikisini İcbari Sığorta Bürosunun üzvləri toplayıb

İcbari Sığorta Bürosu üzvlərinin minimal mükafat həcmi yanvar-avqustda 3,9 mln manat olub. "Alfa Sigorta" cəmi bu qədər toplayıb. 

Büro üzvləri cəmi 184,78 mln manat mükafat toplayıb. Bu, ümumi yığımın (265,71 mln manat) 69,5%-dir. Əgər bura  istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanı da əlavə etsək, yerli bazar icbari sığortadan ibarətdir.

Ödənişlərdə “elita” üzvlərinin payı 58,33 mln manatdır (74,9%). 

İcbari Sığorta Bürosu 16 dekabr 2011-ci ildə yaradılıb. Hazırda 12 üzvü var.  

Büronun əsas funksiyası – kompensasiya ödəmələri həyata keçirmək və onların vasitəsilə bu kompensasiyaların ödəniləcəyi müəyyən maliyyə fondunu idarə etməkdir. Kompensasiyalar Büroya üzv olan sığorta şirkətləri müflisləşəcəyi təqdirdə ödəniləcək. 

Büronun maliyyə vəsaitləri üzvlük haqlarından, hər icbari sığorta növlərinə dair zəmanət depoziti, həmçinin sığorta şirkətlərinin hər ay büroya köçürəcəyi icbari növlərə görə ümumi mükafatların həcminin 5%-dən formalaşır. 

“İcbari sığorta növləri haqqında» qanun 4 icbari sığorta növünə şamil edilir. Bunlar avtonəqliyyat sahiblərinin mülki məsuliyyətinin icbari sığortası, daşınmaz əmlakın sığortası, daşınmaz əmlak istifadəsi zamanı mülki məsuliyyətin sığortası, sərnişinlərin sığortasıdır.

Bu zaman qanunun şərtlərinə görə, bu icbari sığorta növlərinə görə xidmətləri ancaq Büro üzvü olan sığorta şirkətləri təqdim edə bilər. --17D-