Naxçıvanda 15 milyon ton gücündə duz mədəni qazılıb

Bakı/11.06.21/Turan: Naxçıvanda Duzdağ dağında yeni duz mədəni istismara verilib, xəbəri naxcivanxeberleri.com yayıb.

Şaxtanın açılış mərasimi noyabrın 9-da Naxçıvan Muxtar Respublikası Ali Məclisinin sədri Vasif Talıbovun iştirakı ilə keçirilib.

Talıbov qeyd edib ki, Muxtar Respublikada duzun təhlükəsiz və iqtisadi cəhətdən sərfəli metodlarla hasilatı, nəqli, emalı və ixracı diqqət mərkəzindədir. 2018-ci ildən etibarən Duzdağda axtarış-kəşfiyyat işləri aparılıb, 15 milyon ton duz ehtiyatı olan mədən qazılıb, yeni istehsalat kompleksinin tikintisinə başlanıb, duz mədənləri xüsusi qoruma altında olan ərazilər kateqoriyasına aid edilib və xəritəsi tərtib edilib.

Burada çıxarılan duzun keyfiyyət göstəriciləri yüksəkdir. Təhlil nəticəsində müəyyən edilib ki, natrium-xlorid tərkibi 97 faiz təşkil edir.

Yeni mədənin açılması üçün 227 hektarlıq torpaq sahəsi ayrılıb. Duz mədənlərinin ümumi sahəsi 994 hektara çatdırılıb. İstismar edilən və yeni mədənin yerləşdiyi bu ərazi tarixi-mədəni, iqtisadi, turizm-rekreasiya və təbii əhəmiyyətli ərazi kimi qorunması üçün xüsusi qoruma altında olan torpaqlar kateqoriyasına aid edilib. Duzdağda qazılan axtarış quyularının koordinatları dəqiqləşdirilib və topoqrafiya planına əlavə edilib.

Həmçinin mədənlərin sxem və topoqrafiya planları, Naxçıvan-Duzdağ fizioterapiya mərkəzi turizm marşrutunun xəritəsi hazırlanıb, xəritələr və planlar məcmu şəklində dərc edilib və xidmətin elektron məlumatlar bazasına əlavə edilib.

Naxçıvanda duz hasilatı qədim dövrlərdən həyata keçirilir. Sənaye istehsalı 20-ci əsrin əvvəllərində başlayıb və ötən əsrin 80-ci illərində inkişafını tapıb. Duzdağın sənaye ehtiyatları 90 milyon ton olaraq qiymətləndirilir. -0-