Niderland biznesi Azərbaycan iqtisadiyyatının hansı sahələrinə maraq göstərir?

2014-cü ildə Niderland və Azərbaycan arasında əmtəə dövriyyəsi 180 mln. avro təşkil edib. Niderland Azərbaycanda qeyri-neft sektoruna investisiyanın həcminə görə ikinci yeri tutur. Bu barədə Niderland səfiri Robert Qabriels cümə axşamı öz ölkəsinin milli bayramı – Kral gününə həsr olunmuş mətbuat konfransında bildirib.

Bununla belə, səfir qeyd edib ki, son vaxtlar iqtisadi əməkdaşlığın genişləndirilməsi məqsədilə işgüzar əlaqələr canlandırılıb. Ötən həftə Maastrixtdə Azərbaycanın 50-dən çox dövlət institutu və biznes qurumunun iştirakı ilə biznes forum keçirilib. Dövlət Neft Fondunun icraçı direktoru Şahmar Mövsümovun da iştirak etdiyi nümayəndə heyətinə sənaye və iqtisadiyyat naziri Şahin Mustafayev rəhbərlik edib. Foruma Niderlandın 90-dan çox şirkəti qatılıb.

Forumda “Narıncı kataloq” təqdim edilib. Bu, Azərbaycanda fəaliyyət göstərən 50 Niderland şirkəti haqda kitabdır. Azərbaycanda biznes quran Niderland şirkətlərinin sayı 125-ə çatıb.

Venlo şəhərində yerləşən Müasir Qida Məhsulları İstehsalı Mərkəzindən iki ölkənin biznes strukturları arasında əlaqələrin qurulması üçün mərkəz kimi istifadə olunması barədə razılığa gəlinib.

Maastrixt müzakirələrinin davamı olaraq bu həftə Bakıda seminar keçirilib. Seminarda Niderlandın qida məhsullarının ixracı üzrə ikinci yer tutan kənd təsərrüfatının imkanları təqdim olunub.

Səfirin sözlərinə görə, iki ölkə arasında kənd təsərrüfatı sahəsində əlaqələr artıq möcvuddur və indiyədək Niderland Azərbaycana 10 mln. ton müxtəlif bitki toxumu göndərib.

Turan-ın “Azərbaycanda biznes mühiti iqtisadi əlaqələrin   inkişafına necə yardım edir” sualının cavabında səfir bildirib ki, Niderland indiki inkişaf səviyyəsinə “yüzilliklər ərzində, Azərbaycanın transformasiya dövrünü yaşadığı, sovet iqtisadi sistemi mirasından xilas olmağa çalışdığı bir dövrdə” çatıb.

Bununla yanaşı o əlavə edib ki, Niderland şirkətlərinin investisiya qoyuluşu ilə bağlı seçim imkanları var və onlar hara vəsait qoymaq məsələsini özləri həll edirlər.

Azərbaycanda alternativ energetika sahəsində birgə layihələrin reallaşması üzrə danışıqlarla bağlı Turan-ın başqa sualının cavabında səfir deyib ki, hələlik müzakirələr ilkin mərhələdədir.

Əsasən külək enerjisindən istifadə sahəsində layihələrin reallaşması perspektivləri müzakirə olunur. Bu, dənizdə külək stansiyalarının qurulmasını nəzərdə tutur.

Eyni zamanda səfir qeyd edib ki, bu cür layihələrin reallaşması üçün bir sıra məsələlər həll olunmalıdır – maliyyə, dövlətdən icazə alınmalıdır.

Niderland şirkətləri su resurslarından istifadə, logistika, nəqliyyat, yüksək texnologiyalar sahəsində əməkdaşlıq təklif edə bilər.

Niderland həmçinin mədəniyyət, təhsil, idman, elm, sahəsində ikitərəfli münasibətləri genişləndirmək, QHT-lər, şirkətkər arasında əlaqələr qurmaq, insanlararası əlaqələri inkişaf etdirmək niyyətindədir.—06D--