Nyu-York məhkəməsi �Azərbaycan Beynəlxalq Bankı� ASC-nin müraciətini təmin edib

Bakı/13.05.17/Turan: Mayın 12-də Nyu-York məhkəməsi "Azərbaycan Beynəlxalq Bankı" ASC-nin müraciətini təmin edərək bu maliyyə qurumunun aktivlərinin ABŞ-dakı xarici kreditorların iddia tələblərindən qorunması barədə qərar qəbul edib.

ABB-nin xarici öhdəliklərinin könüllü restrukturizasiyası prosesində xarici kreditorlar bankın aktivləri ilə bağlı öz tələblərini irəli sürə bilməyəcəklər, bu maliyyə qurumunun bəyanatında deyilir.

Xarici öhdəliklərin könüllü restrukturizasiyası planı bankın maliyyə durumunun möhkəmlənməsinə xidmət edəcək, məlumatda qeyd olunur. Bu proses bankın uzunmüddətli maliyyə dayanıqlığını, özəlləşdirmədən öncəki mərhələdə onun bazar qiymətinin artırılmasını təmin edəcək.

Bu prosesdə mühüm məqam odur ki, restrukturizasiya zamanı xarici kreditorlar bankın aktivləri ilə bağlı öz tələblərini irəli sürə bilməyəcəklər.

Bankın İdarə Heyətinin sədri Xalid Əhədovun sözlərinə görə, ABB ABŞ-dakı xarici öhdəliklərinin restrukturizasiya prosesinin tanınmasına və kreditorlar tərəfindən iddia tələblərinin qarşısının alınmasına nail olmaq məqsədilə Nyu-York məhkəməsinə müraciət edib.

"Məhkəmə bizim müraciəti təmin etdi",- X.Əhədov vurğulayıb.

Restrukturizasiya planı ABB-nin bir sıra xarici maliyə institutlarından xarici valyutada cəlb etdiyi borcların dövlətə verilməsini nəzərdə tutur. Proses müstəsna olaraq xarici öhdəlikləri nəzərdə tutur.

Digər öhdəliklər, o cümlədən Azərbaycan vətəndaşlarının, hüquqi şəxslər və qeyri-rezidentlərin qorunan və qorunmayan əmanətləri, müddətli və müddətsiz depozitləri üzrə əməliyyatlar adi qaydada yerinə yetirilir.-0--