Oktyabrın 17-dən «Bank Standard»da olan bütün əmanətlər üzrə kompensasiya verilməyə başlanılacaq

Oktyabrın 13-dən Əmanətlərin Sığortalanması Fondu “Bank Standard” əmanətçilərinin 50 min ABŞ dolları və 80 min AZN məbləğinə qədər olan qorunan əmanətlər üzrə kompensasiyaların ödənişinə başlayıb.

Turan-ın məlumatına görə, kompensasiyalar Baş ofis daxil olmaqla Bakı şəhəri və regionlarda yerləşən 14 filialda həyata keçirilir.

  Maliyyə Bazarlarına Nəzarət palatsı öz növbəsində bildirir ki, oktyabrın 17-dən “Bank Standard”da olan bütün əmanətlər üzrə kompensasiya verilməyə başlanılacaq.

   “Bank Standard”da əhalinin əmanətləri 603 mln manatdır. Bunun 460 mln manatı kompensasiya ediləcək. Dollar əmanətləri 175 mln, manat əmanətləri 172 mln-dur.   

“Bank Standard” əmanətçilərinin sayının çox olmasını və əmanətçilər arasında sosial həssas təbəqələrin olmasını nəzərə alaraq Əmanətlərin Sığortalanması Fondu tərəfindən ilkin mərhələdə 20 min ABŞ dollar məbləğinə qədər olan qorunan əmanətlər üzrə kompensasiyaların ödənişi həyata keçiriləcək. Qorunan əmanətlər öz valyutasında ödəniləcək. Bir əmanətçinin bir neçə valyutada əmanəti olduqda, yəni həm milli, həm də xarici valyutalarda əmanəti olduqda kompensasiyalar “Əmanətlərin Sığortalanması haqqında” Azərbaycan Respublikası Qanununa müvafiq olaraq toplanılır və sığorta hadisəsi baş verən günü (04 oktyabr 2016-cı il) olan rəsmi məzənnəyə müvafiq olaraq manatda ödənilir.

Oktyabrın 11-12-də “Bank Standard” əmanətçiləri 20 mln 452 min manat alıb.

Əmanətçilər 2017-ci ilin oktyabrına kimi kompensasiya üçün müraciət edə bilərlər. –71D-