Online köçürmə başlayandan yarım ildə DSMF-yə 5 mln manat daxil olub

İyun-noyabrda icbari sosial sığorta üzrə online köçürmələrin xüsusi çəkisi 4 mln 940,78 min manat olub. 

Dövlət Sosial Müdafiə Fondunun məlumatında deyilir ki, iyundan icbari sosial sığortanı online rejimdə köçürmə üzrə sistem tətbiq edilib. 

İyun-noyabr ayları ərzində 21 544 sığortaedən tərəfindən 57 059 əməliyyat həyata keçirilib. 

Dövlət Sosial Müdafiə Fondu əhaliyə göstərilən 20 növ elektron xidmətin sayını artıraraq 25-ə çatdırmağı nəzərdə tutur. Yeni elektron xidmətlərin sırasına dövlət sosial sığorta şəhadətnaməsinin dəyişdirilməsi və ya dublikatının verilməsi üçün müraciətin onlayn qəbulu, ailə kəndli təsərrüfatının və kənd təsərrüfatına yararlı torpaq sahəsi olan şəxsin onlayn uçota alınması, dəfn üçün müavinətin ödənilməsi ilə bağlı müraciətin və sənədlərin qəbulu, əmək qabiliyyətinin müvəqqəti itirilməsinə görə müavinətlə bağlı haqq-hesab cədvəlinin, hamiləliyə, doğuma və uşağa qulluq etməyə görə müavinətlə bağlı haqq-hesab cədvəlinin təqdim edilməsi və s. daxildir. 

Artıq Dövlət Sosial Müdafiə Fondunun 36 yerli orqanı üzrə 227 659 sığortaedən haqqında məlumat KÖMİS sisteminə inteqrasiya olunub. 

Hesabatların və məlumatların sığortaedənlər tərəfindən elektron formada təqdim olunması ilə bağlı 1 dekabr 2012-ci il tarixə kimi 12 607 sığortaedən unikal kod, parol və şifrə ilə təmin edilib.  -17D-