Prezident xarici borcu azaltmağı tapşırıb

Bakı/11.01.18/Turan: Bundan sonrakı illərdə ölkənin xarici borcunun azaldılması üzrə iş aparmaq lazımdır, bu barədə prezident İlham Əliyev çərşənbə günü Nazirlər Kabinetinin iclasında bildirib.

Onun sözlərinə görə, " o qədər də vacib olmayan" layihələrə xarici borc götürmək lazım deyil. " Əsas vəzifə ondan ibarətdir ki, biz ancaq texnoloji cəhətdən önəmli layihələrə xarici borc götürməliyik. Bundan sonra biz bununla bağlı daha ciddi siyasət yürütməliyik", deyə o bildirib.

Prezident qeyd edib ki, 2017-ci ildə 221 min yeni iş yeri açılıb, bunun 177 mini daimidir. Bununla belə, o, ötən il 47 min iş yerinin bağlandığını etiraf edib və bunun səbəbləri təhlil edilməlidir.

"Azərbaycanda işsizlik 5%, yoxsulluq isə 5,4% faiz səviyyəsindədir. Hesab edirəm ki, bu da dünya miqyasında ən yaxşı nəticələrdən biridir", deyə o bildirib.

İlham Əliyev qeyd edib ki, 2017-ci ildə ixrac 19% artıb, qeyri-neft ixracı 24% artıb.

Prezident ölkəyə gələn turistlərin sayının artmasından məmnunluğunu ifadə edib.

"Turizmin inkişafı ilə bağlı bu il də əlavə tədbirlər görüləcək. 2016-cı ildə xarici turistlərin gəlişi 24 faiz artmışdır, keçən il isə əlavə daha 20 faiz artım olmuşdur və rekord səviyyəyə çatmışdır".

Turistlər bank kartları ilə ötən ilkindən 70 faiz çox pul xərcləyiblər.

"Azərbaycan öz daxili tələbatını daha böyük həcmdə daxili istehsal hesabına təmin edir, digər tərəfdən vətəndaşların alıcılıq qabiliyyəti artır. Beləliklə, idxalın sabit səviyyədə qalması hesab edirəm ki, çox böyük nəticəmizdir. Ticarət balansımızın müsbət saldosu isə 6,2 milyard dollardır. İqtisadiyyatçılar yaxşı bilirlər ki, bu, çox gözəl göstəricidir. Əminəm ki, bu il və bundan sonrakı illərdə bizim saldomuz həmişə müsbət olacaq", deyə o qeyd edib. -71D-