Qiymətli kağızlar bazarında sui-istifadələrin qarşısının alınmasına dair yeni qaydalar qəbul edilib

Azərbaycan Respublikasının Qiymətli Kağızlar üzrə Dövlət Komitəsi dekabrın 14-də  “Qiymətli kağızlar bazarında sui-istifadələrin qarşısının alınmasına dair Qaydalar”ını təsdiq edib. Sənəd dekabrın 25-də Azərbaycan Respublikasının Hüquqi Aktların Dövlət Reyestrinə daxil edilib. 

Qaydalar qiymətli kağızlar bazarında sui-istifadələrin qarşısının alınmasına, şəffaflığın artırılmasına, həmçinin qiymətli kağızlarla aparılan əməliyyatlara nəzarətin effektivliyinin artırılmasına imkan yaradacaq.

İnsayderlərə Müşahidə Şurasının və icra orqanının üzvləri, emitentin fəaliyyətinə nəzarət edən şəxslər, nizamnamə kapitalının 10%-dən çoxuna nəzarət edənlər, son altı ayda bu tələblərin təsiri altına düşənlər və s. aid edilir. 

Qiymətli kağızları kütləvi təklif yolu ilə yerləşdirilən emitentlər xidməti informasiyanı korporativ saytda (olarsa) və Bakı Fond Birjasının internet resursunda yerləşdirir. Emitentlərin xidməti informasiyadan istifadə üzrə daxili qaydaları olmalıdır.

İnsayder emitentin səhmləri ilə əqd zamanı informasiyanı bir gündə QKDK-ya və emitentə verir. Emitent bu informasiyanı alandan sonra bir gün ərzində açıqlayır. 

QK bazarında manipulyasiya faktı aşkarlayanda QKDK əqd bağlanmasını və ya onun icrasını dayandırır. Bu əqdlərdə iştirak edən broker lisenziyadan məhkəmə qaydasında məhrum edilə bilər. 08D