Səhm dövriyyəsi il ərzində 4% azalıb

2013-cü ildə korporativ istiqrazların təkrar dövriyyəsi hesabına korporativ qiymətli kağızlar bazarında 31% artım olub. Yerləşdirmə həcmi azaldığı üçün illik səhm dövriyyəsi 4% azalıb.

Korporativ QK üzrə 4749 əqd üzrə 1 736,8 mln manat dövriyyə olub. Bu, 2012-ci ilin göstəricisindən 60% çoxdur. Dövriyyənin 66%-i  korporativ istiqrazların payına düşür. Qiymətli Kağızlar üzrə Dövlət Komitəsinin hesabatına əsasən, İpotek Fondu 761,1 mln manatla əsas oyunçudur. Bu, onun QK-ı dövriyyəyə daxil ediləndən ən yüksək göstəricidir. Bunun 57,3 mln manatı ipoteka layihələrinin maliyyələşməsi üçün AİF istiqrazlarının yerləşdirilməsinin payına düşür. 

Özəl şirkətlər 2013-cü ildə illik dövriyyəsi 182,6 mln manat olan korporativ istiqrazlar buraxıb. Bu, 2012-ci ildəkindən 84% çoxdur.  

Maraqlıdır ki, korporativ istiqrazların ilkin yerləşdirilməsi həcmi (344,4 mln manat) ötən il 6% azalıb, artım isə təkrar dövriyyə hesabınadır. 

Ötən il səhmlərin təkrar bazarında 495 şirkətin səhmləri aktiv ticarət olunub. Ümumi əqd həcmi 573,2 mln manat olub. Bu, 2012-ci ildəkindən 4% azdır. İlkin səhm yerləşdirməsi 352 əqd üzrə 424,7 mln manat olub. Bu, 2012-ci ildəkindən 16% azdır. Təkrar səhm bazarında 60% artım olub. QKDK-da qeyd edirlər ki, səhm bazarında azalma dövlətin aktivliyinin azalması ilə bağlıdır. 2012-ci ildə o, 200,5 mln manat məbləğində səhm yerləşdirmişdi. 08D