Sənayedə 0,6% artım

Bu ilin 8 ayında Azərbaycanda sənaye istehsalının tempi 100,6% olub. Bu, emalda məhsulun 6% artımı hesabına baş verib. Sənaye istehsalında zəif artımı müsbət tendensiya saymaq olar, çünki 2012-ci ildə sənayedə 2,3% azalma olub.   

Ötən 8 ayda sənaye istehsalının həcmi 22,5 mlrd manat olub. Sənayenin ümumi məhsulu 18,4 mlrd manat təşkil edib. Bu, ötən ilin eyni dövründəkindən 0,2% azdır. 

Dövlət sektoru 4,2 mlrd manatlıq sənaye məhsulu istehsal edib. Bu, ötən ilin eyni dövründəkindən 6% çoxdur. Qeyri-dövlət sektorunun payı 81,3%-dir (18,3 mlrd manat). Qeyri-dövlət sektorunda 0,6% azalma olub, deyə Dövlətstatkomda Turan-a bildiriblər.  

Sənaye mallarının strukturunda hasilat sənayesinin xüsusi çəkisi (16,7 mlrd manat) 74,3% olub. Karbohidrogen və metal istehsalı 0,4% azalıb.  

Emal sənayesinin istehsal həcmi 4 457 mln manat olub. Bunun 38,4%-i qida sənayesinin payına düşür. İlin əvvəlindən 1,4 mlrd manatlıq (+7,2%) neft məhsulları istehsal edilib. 

Bir sıra sənaye sahələrində tənəzzül olub. Tütün məhsulları (8,3 mln manat) 32,5%, tikiş məhsulları (24,9 mln manat) 30,3%, paltar (19 mln manat) – 10,7%, taxta məmulatı (2,6 mln manat) – 13,8%, kağız və karton (10 mln manat) – 11,9%, rezin və plastmass məmulatı (40,5 mln manat) 12,1% azalıb. Hazır metal məmulatı istehsalı 49% azalıb. Bu müəssisələrdə istehsal həcmi 60.6 mln manat olub. 

Rəsmi məlumata görə, ilin 8 ayında sənaye müəssisələrinin yaradılması və inkişafına 4,5 mlrd manat investisiya qoyulub. Bu, 2012-ci ilin eyni dövründəkindən 42% çoxdur.  08D