SOCAR Rumıniyanın neft məhsulları bazarına 50 mln avro qoyacaq

SOCAR 2015-2016-cı illərdə Rumıniyada «SOCAR» brendli 13-14 yanacaqdoldurma məntəqəsi açmaq istəyir, deyə Rumıniya mətbuatı SOCAR-ın sərmayələr və marketinq üzrə vitse-prezidentinin müavini Vitali Bəylərbəyova istinadən bildirir.

Onun sözlərinə görə, hazırda şirkətin Rumıniyada 32 yanacaqdoldurma məntəqəsi var.

«Biz qürur duyuruq ki, belə bir şirkət qurduq və bu YDM-lərdə təxminən 500 nəfər işlə təmin edilib. İlk planımız yerli bazarda satış həcmini və YDM-lərin sayını artırmaq olacaq. İlin sonuna qədər 3-4 yeni stansiya istifadəyə veriləcək və gələn il daha 10 stansiyanın da istifadəyə verilməsini düşünürük”, deyə Bəylərbəyov bildirib.

Onun sözlərinə görə, bəzi YDM-lər sıfırdan tikiləcək, bəziləri alınacaq və adı dəyişdiriləcək.

“Azərbaycan Dövlət Neft Şirkəti Rumıniyadakı yanacaqdoldurma məntəqələrinin (YDM) sayının artırılmasına 50 mln avro sərmayə qoyub. Analoji məbləğ yaxın 2-3 ildə  yanacaqdoldurma məntəqələrinin sayının artırılmasına yönəldiləcək», - deyə Bəylərbəyov qeyd edib.

Xatırladaq ki, SOCAR Rumıniya bazarına 2011-ci ilin oktyabrından fəaliyyət göstərir. 12D--