SOCAR Türkiyədə layihələr həyata keçirməkdə və investisiya qoymaqda davam edəcək

SOCAR Türkiyədə layihələr həyata keçirməkdə və investisiya qoymaqda davam edəcək, deyə şirkətin prezidenti Rövnəq Abdullayev “Anadolu” agentliyinə müsahibəsində bildirib.

“SOCAR Türkiyədə həyata keçirdiyi ümumi məbləği 18 mlrd. dollardan artıq olan və aralarında Avropanın enerji ehtiyacını qarşılayacaq investisiyaların da olduğu layihələri tam gücü ilə davam etdirəcək. SOCAR-ın Türkiyədə birbaşa və dolayı olaraq 40 min əməkdaşı fəaliyyət göstərir”, - deyə o vurğulayıb.

Abdullayev xatırladıb ki, yaxın gələcəkdə Türkiyədə Egey dənizi bölgəsinin ən böyük konteyner limanı, 2018-ci ildə isə “Star” NEZ istismara veriləcək.

““Petkim”dəki fəaliyyətimiz Türkiyəyə və iqtisadiyyatına olan etibarımızın simvoludur. Türkiyə bizim evimizdir, bu günə qədər olduğu kimi bundan sonra da Türkiyədəki investisiyalarımızı davam etdirəcəyik”, - deyə SOCAR prezidenti qeyd edib.

Türkiyədə baş verən hərbi çevriliş cəhdlərinin müasir cəmiyyətlərdə qəbuledilməz olduğunu deyən R.Abdullayev bu cür cəhdlərin sadəcə demokratiyaya və hüquqi dövlətə deyil, həm də iqtisadi inkişafa böyük zərbə vurduğunu diqqətə çatdırıb.

Y yüzlərlə insanın həyatını itirməsi ilə əlaqədar təəssüf hissi keçirdiyini qeyd edən SOCAR prezidenti bəyan edib: “Türkiyə hökumətinə, xalqın iradəsinə, ölkənin iqtisadiyyatına, sabitliyinə etibarımız həmişə olduğu kimi tamdır” –0--