SOCAR xarici mütəxəssislərlə birgə qaz quyusunu söndürmək istəyir

Hazırda “Günəşli” yatağında №10 özüldə qaz quyusunda yanğın davam edir, deyə dünən “AZneft” şirkətinin baş mühəndisi Balamirzə Ağarəhimov AzTV kanalına bildirib.

Onun sözlərinə görə, neft quyularında yanğın söndürülüb. “Özüldə 30 quyu var. 2 quyu işləmirdi. 24 neft quyusu qazlift üsulu ilə işləyirdi. Yəni neft özü yüksəyə qalxırdı. İlk gündən neft quyularına qaz verilməsi dayandırıldı. Sonra qalıq neft yandı. İndi 4 qaz quyusunda yanğın davam edir”, - deyə o bidlirib.

Əvvəllər o, Turan müxbirinə bildirmişdi ki, №10 özüldə 1 sutkada 1 mln kubmetr qaz çıxarılır.

Balamirzə Ağarəhimov deyib ki, SOCAR amerikalı mütəxəssislərin köməyindən istifadə etmək istəyir. Boots & Coots şirkəti bizdən platformanın və avadanlıqların sxemini istəyiblər. Müzakirələrdən sonra tədbirlər planı hazırlanacaq”, deyə o bildirib.

11 dekabrda avadanlıqlar “General Əliağa Şıxlinski” gəmisinə yüklənib №10 özülə gətirləcək. Burda Boots & Coots mütəxəssisləri SOCAR nümayəndələri ilə onları quraşdırıb yanğın gəmiləri və FHN vertolyotları ilə birgə yanğını söbdürmək istəyirlər.

2013-cü ildə SOCAR “Bulla dəniz” yatağında yanğın zamanı da Boots & Coots mütəxəssislərinin köməyindən istifadə etmişdi. O vaxt yanğın 60 gün davam etdi. –12B--