«Standart» Bankın əmanətçilərinə kompensasiyaların verilməsi üçün Əmanətlərin Sığortalanması Fondu Mərkəzi Bankdan 460 milyon manat alacaq

“Standart” Bankın əhaliyə əmanətlərin böyük hissəsini dollarla kompensasiya etməsi üçün  Əmanətlərin Sığortalanması Fondu  birbaşa Mərkəzi Bankdan valyuta alacaq. Bunu Fondun icraçı direktoru Azad Cavadov bildirib.

Turan məlumat verir ki, onun sözlərinə görə, bu cür alqı valyuta bazarında qiymətlərə təsir etmir.

“Standart” Bankda əhalinin əmanətləri 603 mln. manat təşkil edir. Kompensasiya edilən əmanət 460 mln. manatdır. Dollarla əmanətlər

175 mln., manatla 172 mln. təşkil edir”, - A.Cavadov bildirib.

 Fond rəhbəri qeyd edib ki, əmanətin multivalyuta səbətində (xarici valyuta + manat– red.) kompensasiya manatla qaytarılacaq.

A.Cavadov bildirib ki, “Standart” Bank əmanətçilərinə kompensasiyanın verilməsi üçün Fond Mərkəzi Bankdan 10 il müddətinə 0,15% ilə 460 mln. manat kredit götürəcək.  

Hüquqi şəxslərin “Standart” Bankdakı vəsaitlərinə toxunan Fond rəhbəri qeyd edib ki, “Banklar haqqında” qanuna görə, həmin vəsait sığorta olunmayan əmanətlərə bərabər tutulur.

“Belə olan halda növbəlilik qaydası tətbiq ediləcək. Yəni, sığorta olunan əmanətlər üzrə kompensasiyanın verilməsindən sonra əgər vəsait imkan verərsə növbəlilik prinsipi ilə sığorta olunmayan əmanətlərə malik fiziki şəxslərə və hüquqi şəxslərə qaytarılacaq”, - o bildirib.

A.Cavadov deyib ki, Əmanətlərin Sığortalanması Fondu “Standart” Bankın likvidatoru kimi çıxış edəcək və artıq oktyabrın 1-dən əmanətçilər vəsaitlərin qaytarılmqsı üçün ərizələrin verilməsinə başlaya bilər.

“Biz öz öhdəliyimizi 100% yerinə yetirəcəyik və əmanətçilərin bütün vəsaitləri qaytarılacaq”, - Fondun rəhbəri bildirib.–71В-