TANAP layihəsi bahalanıb

Transanadolu qaz kəmərinin yeni qiyməti elan edilib. Bu barədə ARDNŞ prezidenti Rövnəq Abdullayevin dünən Türkiyənin energetika naziri Taner Yıldızla görüşündən sonra məlumat verilib.

ARDNŞ rəhbəri deyib ki, TANAP layihəsinin həyata keçirilməsi üçün 10-12 mlrd dollar lazımdır. O, əlavə edib ki, qrafikə əsasən, 2014-cü ilin II yarısında kəmərin tikintisi üzrə fiziki işlər başlayacaq. "Hazırda hüquqi və maliyyə məsələləri həll edilir", deyə Abdullayev izah edib. 

Əvvəllər ARDNŞ rəhbərliyi bildirirdi ki, TANAP 7-8 mlrd dollara başa gələcək. Qiymət artımı marşrutun dəqiqləşdirilməsi ilə əlaqələndirilir. 

Hazırda TANAP çərçivəsində dəqiq marşrut müəyyən edilir. 

Taner Yıldızın sözlərinə görə, 2013-cü ilin sonuna kimi bu işlər görüləcək: hüquqi prosedurlar başa çatacaq, torpaq işləri başlayacaq. "Layihənin həyata keçməsi bütün regiona fayda gətirəcək ", - deyə Yıldız bildirib. 

TANAP qaz kəməri üzrə Azərbaycan-Türkiyə hökumətlərarası sazişi 25 iyun 2012-ci ildə İstanbulda imzalanıb. 1750 km uzunluğunda, ilkin buraxılış qabiliyyəti 16 mlrd kubmetr olan kəmərin tikintisi 2018-ci ilin əvvəlində başa çatacaq. Hazırda TANAP Co-nun səhmlərinin 80%-i ARDNŞ-yə, 20%-i BOTAS-a məxsusdur. ARDNŞ payını 51%-ə azaldacaq və hazırda BP, Statoil və Total-la danışıqlar gedir. --12С--