Üç helikopter satılır

Azərbaycanda üç helikopter ümumi qiyməti 400 min manata ($0,5 mln) satışa çıxarılıb.

Əmlak Məsələləri Dövlət Komitəsi 28 oktyabrda 1990-1993-cü illərdə AZAL-ın istismarında olan Mİ-8 MTV1 markalı üç helikopteri hərraca çıxaracaq.
Mİ-8 MTV1 helikopteri sərnişin (22 nəfər), eləcə də kabinə daxilində və asma yolla 4 ton yük daşımaq üçündür. Doldurub-boşaltma üçün kabinədə elektrobucurğad var. Adamları sudan və ya yerdən qaldırmaq üçün LPQ-150 bucurğadı da var.

2008-ci ildə “Silk Way Helicopter Services” MMC yaradılandan sonra AZAL-ın  helikopter infrastrukturu bu şirkətə verilib. Formal olaraq “Silk Way Helicopter Services” Zabratdakı aeroportun, onun anqar və nəqliyyat vasitələrinin icarəçisidir. Zabrat aeroportu müasir standartlara cavab verir.

“Silk Way Helicopter Services” MMC-nin S-92A, AS-332 L1 «Super Puma», EC-155 B1, EC-135, MI-171, MI- 8MTV-1, Cessna Skyhawk 172 S helikopterləri var, deyə şirkətin saytında bildirilir. Onların sayı açıqlanmır.

Bu günlərdə aviaşirkət AW139 VIP markalı daha bir helikopterin istismarına başlayıb. Bu helikopter yüksək komfortludur və VIP sərnişinlər üçündür.

“Silk Way Helicopter Services” “Silk Way Holding” şirkətlər qrupuna daxildir. KİV bildirir ki, 20 nəqliyyat, servis, sənaye, maliyyə şirkətini birləşdirən bu qrup prezident Əliyevin ailəsinə məxsusdur. Bu informasiyanı nə təsdiq, nə də təkzib ediblər. 08B