Vergi ödəyiciləri üçün Asan SXM

Vergi ödəyiciləri Vergilər Nazirliyinin nəzdində müasir tipli Elektron imza üzrə Sertifikat Xidmətləri Mərkəzinin (Asan SXM) xidmətindən istifadə edə bilərlər. 

Nazirliyin məlumatına görə, xidmət Rabitə və İnformasiya Texnologiyaları Nazirliyində akkreditə edilib. Asan SXM “Rəqəmsal İD” adlandırdığımız elektron imza kartları üzərindən xidmət göstərmək imkanına malikdir. Rəqəmsal imza ilə elektron əməliyyatlar mümkündür. İmzalanan hüquqi sənədin çoxlu hüquqi gücü olan surətini çıxarmaq mümkün olacaq. 

Rəqəmsal sənədlər fiziki məkan tutmur. Elektron poçt sayəsində məmurlarla təmas aradan qalxacaq. 

Bu kartlar bütün əməliyyat sistemlərini (MS Windows, Unix, Mac OS) dəstəkləyir. Mobil operatorlar xüsusi sim kart vasitəsilə köməyə gələ bilərlər. 

İstifadəçi səlahiyyətlərinin idarə edilməsi sistemi yaradılıb, hüquqi və fiziki şəxslərin onlayn qeydiyyatı; POS-terminalların qeydiyyatı; elektron vergi-hesab fakturalarının göndərilməsi; ƏDV-nin Depozit hesabı və s. xidmətlərdə Asan İmzanın tətbiqi həyata keçirilib. 

Nazirlik bildirir ki, istifadəçi kodu, parol və şifrə vasitəsilə sistemə daxil olmaq, müasir beynəlxalq təhlükəsizlik standartlarının tələblərinə cavab vermədiyindən və istifadəsi zamanı problemlər yarandığından, ƏDV-nin depozit hesabı, Elektron vergi hesab-fakturaları kimi təhlükəsizlik tələb edən xidmətlərin istifadəsi yaxın zamanlarda yalnız Asan İmza vasitəsilə mümkün olacaq. Ətraflı məlumatı Vergilər Nazirliyinin rəsmi internet səhifəsinin “Asan İmza” bölməsindən (www.taxes.gov.az ), www.asanimza.az saytından və İnternet Vergi İdarəsinin Yardım bölməsindən ( www.e-taxes.gov.az ) əldə etmək olar. --17D—