«Xarici sərmayənin lazımi səviyyədə olmamasının əsas səbəbi qeyri-şəffaf vəziyyətdir», İlham Əliyev 

Bakı/10.07.18/Turan: "İqtisadi və maliyyə sektorlarında maksimum şəffaflıq təmin edilməlidir", deyə Azərbaycan prezidenti İlham Əliyev Nazirlər Kabinetinin 9 iyul tarixli iclasında bildirib.

Onun sözlərinə görə, qeyri-neft sektoruna xarici sərmayənin lazımi səviyyədə olmamasının əsas səbəbi qeyri-şəffaf vəziyyətdir.

Onun szölərinə görə, qanunvericilikdə də əlavə tədbirlər görülməlidir, baxmayaraq ki, bizim qanunvericiliyimiz xarici sərmayənin cəlb edilməsi üçün çox əlverişlidir.

"Bütün dövlət qurumları, eyni zamanda, sahibkarlar da bilməlidirlər ki, vergi və gömrük sistemlərində tam şəffaflıq təmin edilir, bərabər şərait yaradılıbdır, qeyri-sağlam rəqabətə son qoyulur. Sahibkarlar tam aydın bilməlidirlər ki, işləmə qaydaları nədən ibarətdir. O da çox sadədir: qanunlara riayət etmək, vergiləri tam ödəmək, qaçaqmalçılıqla məşğul olmamaq və ölkə iqtisadiyyatına ziyan vurmamaq".

Prezident deyib ki, sahibkarlar da öz tərəfindən bu işlərdə məsuliyyətlərini göstərməlidirlər. Vergidənyayınma hallarına son qoyulmalıdır. Bu, kiçik və böyük sahibkarlara aiddir. Hamı qanun qarşısında bərabər olmalıdır.

İ.Əliyev iqtisadiyyatın ümumi vəziyyətinə toxunaraq qeyd edib ki, böhranın aşağı itkilərlə aradan qaldırılmasına nail olduq.

Onun sözlərinə görə, bu ilin göstəriciləri göstərir ki, ötən illərdə həyata keçirilən islahatlar və bu il çox yaxşı nəticələr verilir.

Dövlət başçısı deyib ki, 6 ayda ümumi daxili məhsul 1,3 faiz artıb. O cümlədən qeyri-neft sektorunda 2 faiz artım olub.

"Sənaye istehsalı 1 faiz artsa da, bu da məqbul rəqəmdir. Qeyri-neft sənayemiz 8,8 faiz artmışdır. Bu, onu göstərir ki, qeyri-neft sektoruna qoyulan investisiyalar, sahibkarlara göstərilən dəstək öz bəhrəsini verir".

Prezidentin sözlərinə görə, 67 min yeni iş yeri yaradılıb, onlardan 58 mini daimidir.

Ölkə iqtisadiyyatına 6 milyard dollar sərmayə qoyulmuşdur. İnflyasiya cəmi 3 faizdir. Əhalinin pul gəlirləri 9,3 faiz artıb.

Xarici ticarət dövriyyəsi 35 faiz artıb. İxrac 34 faiz, o cümlədən qeyri-neft ixracı 20 faiz artıb. Xarici ticarətin müsbət saldosu 4,2 milyard dollardır.
İ.Əliyevin fikrincə, bu, çox böyük rəqəmdir, bir daha onu göstərir ki, makroiqtisadi sabitlik tam təmin edilir.

O, əlavə edib ki, ilin əvvəlindən valyuta ehtiyatları artıb və bu gün ı 44,3 milyard dollar təşkil edir.

Dövlət başçısı bu ilin birinci yarısında nəqliyyat, energetika sahələrində önəmli hadisələr baş verdiyini deyib. "May ayında Ələt Beynəlxalq Dəniz Ticarət Limanı istifadəyə verilmişdir. Bu, çox böyük hadisədir. Deyə bilərəm ki, bu, keçən il Bakı-Tbilisi-Qars dəmir yolunun istismara verilməsindən sonra nəqliyyat sektorunda ikinci böyük hadisədir".

İ.Əliyev digər əhəmiyyətli hadisə kimi may ayında Cənub Qaz Dəhlizi və iyun ayında TANAP-ın rəsmi açılışını qeyd edib.

"Beləliklə, Cənub Qaz Dəhlizinin dörd layihəsindən üçü artıq reallaşıb - "Şahdəniz-2", Cənubi Qafqaz Kəməri və TANAP layihəsi. Dördüncü layihə - TAP qrafik üzrə icra edilir". -71D-