AMB icbari avtosığortanın satışından imtinaya aydınlıq gətirib

Bakı/17.01.23/Turan: Azərbaycan Mərkəzi Bankı (AMB) sığorta şirkətlərinin əsasən taksi kimi istifadə olunan kiçik mühərrikli avtomobillərin sahiblərinin mülki məsuliyyətini sığortalamaqdan imtina etməsi barədə deyilənlərə aydınlıq gətirib.

Qurumun açıqlamasında bildirilir ki, sığortaçılar avtomobilləri sığortalamaqdan imtina etmək hüququna malik deyil.

“İcbari sığortalar haqqında” qanuna əsasən, sığortaçı müvafiq riskləri sığorta etdirmək üçün müraciət edən və sığorta marağı olan şəxslə icbari sığorta müqaviləsi bağlamaqdan imtina edə bilməz. Belə hallar baş verdiyi təqdirdə vətəndaşlar 966 qaynar xəttinə zəng vurmaqla və yaxud yazılı şəkildə müraciət etməklə AMB-yə şikayətlərini bildirə bilərlər. Bütün şikayətlər operativ qaydada nəzarətə götürülərək dərhal araşdırılır və qısa müddətdə vətəndaşın seçdiyi sığortaçının icbari sığorta şəhadətnaməsini satması təmin edilir.

Hazırda icbari avtosığorta bazarında vəziyyətə nəzarət edilməsi və mövcud problemlərin həlli məqsədilə mütəmadi olaraq AMB ciddi monitorinqlər həyata keçirir, hərtərəfli təhlillər və qiymətləndirmələr aparır. Qiymətləndirmələrin nəticələri əsasında zəruri addımların atılması davam etdiriləcək”, - deyə tənzimləyici qurum bəyan edib. -0-